اناسىن ىزدەگەن جانىبەككە قاتىستى تىڭ دەرەكتەر جاريالاندى، دەپ حابارلايدى "ادىرنا" ءتىلشىسى.
جۋرناليست “1001 ءتۇن” باعدارلاماسىنىڭ جۇرگىزۋشىسى قىمبات دوسجان جانىبەك دۇنيەگە كەلگەننەن كەيىن 4-5 كۇن پەرزەنتحانادا ەمىزىپ، اق ءسۇتىن بەرگەن انانى تاپقانىن ايتىپ، كوپتەن ءسۇيىنشى سۇرادى.
“الەۋمەتتىك جەلىدە باسىم كوپشىلىگى جانىبەككە جانى اشىپ جاتسا، ەندى بىرەۋلەر “قازاقستاندا نە بار؟ ەۋروپاڭدا كۇشتى عوي” دەپ جازىپتى. ودان بولەك تاعى ءبىر توپ بولدى. سول توپتى زەرتتەي كەلە بولجامدى انا، قۇجات بويىنشا سول ايەلدىڭ ەسىمىمەن، ەكىنشى بالاسىن دۇنيەگە اكەلگەن ايەلدى تاپتىق. بىراق ەكى بىردەي تاپسىرعان اناليزدە سايكەستىك 0 بولىپ شىقتى. ء“ۇي جاعدايىنداعى شارۋالاردى رەتتەپ، تۇنگى ساعات 10:00-دە قايتىپ كەلەمىن” دەگەن قولحات تا سول انانىڭ قولىمەن جازىلعان”، – دەيدى جۋرناليست.
قازىر ارقالىقتان استاناعا كەلگەن پوليتسەيلەر ءىستىڭ قارالىپ جاتقانىن ايتادى. ول تۋرالى قىمبات دوسجان جازدى.
“باستاپقىدا “سالعىرتتىق” دەگەن باپ بويىنشا ىس اشىلىپ، كەيىن بۇل وقيعانىڭ بولعانىنا 20 جىلدان اسا ۋاقىت وتكەن سوڭ جاۋىپ تاستادى. ودان كەيىن مەن جانىبەكتىڭ اتىنان پروكۋراتۋراعا ارىز جازدىم. ءسويتىپ قاڭتار ايىنىڭ اياعىندا باسقا باپپەن تەرگەۋ باستالدى. قازىر تەرگەۋشىلەر استاناعا كەلدى. ولاردىڭ وسىندا جۇمىس ىستەپ جاتقانىنا ءبىر اپتاداي ۋاقىت بولدى. كەشە سۇحبات بەرگەنىمدە 14 انا دەپ ايتتىم. ال بۇگىن 6 ايەلدىڭ ءاناليزى شىقتى. جانىبەك 1-2 كۇندە كەتىپ قالادى. “وسىنىڭ اراسىنان شىعىپ قالا ما؟” دەگەن ويمەن لابوراتورياداعىلار تۇسكەن اناليزدەردى شۇعىل تۇردە تەكسەرىپ جاتىر. 14 بولجامدى انا مەن 1 ەر ادامنان اناليز الىندى. ءبىز بۇكىل رەداكتسيا، “قازاق راديوسى” سول ەر ادام جانىبەكتىڭ اكەسى بولىپ شىقسا ەكەن” دەپ قۇدايدان تىلەدىك. بىراق امال نەشىك، ول دا 0 بولىپ شىقتى. سول ەر ازامات “مەنىڭ بالام بولىپ شىقسا ەكەن” دەپ كەلگەنىن ايتتى”، – دەيدى قىمبات دوسجان.
