گازا سەكتورىنا اۋەدەن تاستالعان گۋمانيتارلىق جۇك تيەلگەن بىرنەشە پاراشيۋت اشىلماي، جەردە كومەك كۇتكەن پالەستينالىقتاردىڭ ۇستىنە قۇلادى، - دەپ حابارلايدى "ادىرنا" ۇلتتىق پورتالى Anadolu باسىلىمىنا سىلتەمە جاساپ.
كۋاگەرلەردىڭ ايتۋىنشا، جاشىكتەر شاتي بوسقىندار لاگەرىندە جانە گازانىڭ سولتۇستىگىندەگى دجالا كوشەسىندە گۋمانيتارلىق كومەك كۇتىپ تۇرعان بەيبىت تۇرعىندارعا قۇلاعان. وقيعا سالدارىنان، الدىن الا مالىمەت بويىنشا، بەس ادام قازا تاۋىپ، تاعى بىرنەشە ادام جارالانعان.
ەگيپەت، ءباا، يوردانيا، قاتار، ومان جانە باحرەين سوڭعى اپتادا گازا سەكتورىنا اۋە كومەگىن جەتكىزۋ ءۇشىن بىرلەسكەن وپەراتسيالار جۇرگىزدى.
بۇعان دەيىن گۋمانيتارلىق كومەككە قول جەتكىزگىسى كەلگەن پالەستينالىقتار ءتۇرلى قيىنشىلىقتارمەن بەتپە-بەت كەلگەن. ماسەلەن، گازاعا تۇسكەن كومەكتىڭ ءبىر بولىگى تەڭىزگە قۇلاعان بولاتىن. كەيبىرەۋلەرى شاعىن بالىق اۋلاۋ قايىقتارىمەن تەڭىزگە شىقسا، ال كەيبىرەۋلەرى جۇك جاشىكتەرىنە جەتۋ ءۇشىن ءجۇزىپ بارعان.
بىرىككەن ۇلتتار ۇيىمى جانە باسقا دا حالىقارالىق ۇيىمدار اشتىق، ءشول جانە گيگيەنالىق ماتەريالداردىڭ جەتىسپەۋشىلىگىنەن تۋىنداعان اۋرۋلار بەلەڭ العان گازادا اتىستى توقتاتۋعا جانە گۋمانيتارلىق كومەك اعىنىن ارتتىرۋعا شاقىرۋدا.
ەسكە سالا كەتەيىك، 7 قازاننان بەرى ءيزرايلدىڭ گازا سەكتورىنا جاساعان شابۋىلدارىنان 30 800 پالەستينالىق مەرت بولىپ، ونىڭ ىشىندە كەمىندە 13 430 بالا قازا تاۋىپ، 72 298-ءى جارالانعان.
