ارىستاعى اپاتتىڭ سالدارىنان ءۇش ادام كوز جۇمىپ، قىرىق مىڭنان اسا ازاماتىمىز ءوز باسپاناسىن تاستاپ، باس اۋعان جاققا بوسىپ كەتىپ، انا اڭىراپ، بالا اداسىپ، كۇركەلەر قيرادى. ءاپ ساتتە حالىق جيعان-تەرگەنىنىڭ بارىنەن ايىرىلىپ، كۇلىن سيپاپ قانا قالدى. قايسىبىرىن ايتايىق، ءبىر سۇمدىقتى باستان كەشتىك. شۇكىر. كەشتىك! بۇل وقيعانىڭ ءوتىپ كەتكەنىنە قۇدايىمىزدى ءۇيىرىپ وتىرمىز. دەگەنمەن حالىق ءالى دە بولسا، جابىرەيىل جانىندا تۇرعانداي، قالت-قۇلت ەتىپ قادامىن ارەڭ باسۋدا... ەسىمىزدى جيىپ، ەتەك-جەڭىمىزدى قولعا الىپ ۇلگەرمەدىك تە! ۇكىمەت ارتىق-اۋىز اڭگىمەدەن تەزىرەك ارىلۋ ءۇشىن حالىقتى "سۇيەگىڭ سول جەردەن شىقسىن" دەگەندەي قاۋىپتى ايماققا قايتا اپارىپ تاستادى. وسىنداي سۇمدىقتاردى باستان كەشكەندە الدەكىمنەن جىلۋ مەن اۋىز ءسوز دەمەۋ كۇتەدى ەكەنسىن. "دوس-جوقشىلىقتا سىنالادى" دەمەكشى ارىستاعى اپاتقا كورشىلەس مەملەكەتتەردەن كوڭىل ايتۋ حاتتارى بىرىنەن كەيىن ءبىرى اعىلىپ كەلىپ جاتىر، كەلىپ جاتىر. ونىڭ ءوزى جىرىم-جىرىم جۇرەگىمىزگە از دا بولسىن جاماۋ بولعانى جاسىرىن ەمەس. ماسەلەن، تۇركيا پرەزيدەنتى رەدجەپ تايپ ەردوعان "ارىس قالاسىنداعى اسكەري ءبولىمنىڭ قويماسىندا بولعان جارىلىس سالدارىنان قازا بولعاندارعا اللادان راقىم تىلەپ، زارداپ شەككەندەردىڭ تەزىرەك ساۋىعىپ كەتۋىنە تىلەكتەستىك بىلدىرەمىن" دەسە، قىرعىزستان پرەزيدەنتى سوورونباي جەەنبەكوۆ تەلەفون ارقىلى تىلدەسىپ، ءاردايىم بىزبەن بىرگە ەكەنىن تىلگە تيەك ەتتى. مۇنداي كوڭىل ايتۋ جەدەل-حاتتارى جەتەرلىك. وسى ورايدا رەسەي فەدەراتسياسىمەن ەكىجاقتى جانە كوپجاقتى فورماتتارداعى كەلىسسوزدەر بارىسىندا ەنەرگەتيكالىق، كولىكتىك، اتوم جانە عارىش سالاسىنداعى بىرلەسكەن جوبالاردى جۇزەگە اسىرىپ، ساۋدا-ەكونوميكالىق ءوزارا ءىس-قيمىلداردى بىرگە اتقارىپ جۇردىك. بىراق جاقىنىم دەگەن سايىن الىستاعان رەسەي قان جۇتىپ وتىرعان قازاق حالقىنا باسۋ ايتىپ، ءبىر جاپىراق قاعازىن دا جولدامادى. تۇپتەپ كەلگەندە ءبىر ناندى ءبولىسىپ جەگەن، ءبولىسىپ دەپپىن-اۋ، ءبۇتىن ناندى ورىستىڭ اۋزىنا سالىپ بەرگەنىمىزگە دە قاراماي، قۇدايدىڭ بەرگەن تەگىن ءسوزىڭ قيماعان رەسەيدى قالاي اقتاپ الۋعا بولادى؟! الدە «قازانى باسقانىڭ – قايعىسى باسقا» دەگەن پوزيتسيانى ۇستانىپ ءجۇردى مە ەكەن؟! بالكىم بۇنىڭ ءمانى ءبىز ويلاعاننان دا تەرەڭدە شىعار. بالكىم پۋتين ءۇشىن ءبىز تۇككە تۇرعىسىز ەل شىعارمىز..الايدا ءبىزدىڭ پرەزيدەنتىمىز ق. توقاەۆ كەرىسىنشە ارەكەت ەتتى. رەسەيدە ورىن العان يركۋتسك وبلىسىنداعى سۋ تاسقىنى سالدارىنان ادامداردىڭ قايتىس بولۋىنا بايلانىستى كوڭىل ايتىپ، جەدەلحات جولدادى. بىلايشا ايتقاندا، بەرمەسە دە بەرىپ ۇيالتتى. ايتكەنمەن ۇيالىپ وتىرعان رەسەيدى كورگەن جوقپىز..جالپى بۇنى قالاي دەسەك تە، نە دەسەك تە ءتۇسىندىرۋدى قاجەت ەتەتىن تەورەما بولىپ تۇر!
ءبىز سەنگەن ۇلى رەسەي فەدەراتسياسى بۇنداي ەمەس ەدى عوي...
اقگۇل ايداربەكوۆا
"ادىرنا" ۇلتتىق پورتالى
