Arystaǵy apattyń saldarynan úsh adam kóz jumyp, qyryq myńnan asa azamatymyz óz baspanasyn tastap, bas aýǵan jaqqa bosyp ketip, ana ańyrap, bala adasyp, kúrkeler qırady. Áp sátte halyq jıǵan-tergeniniń bárinen aıyrylyp, kúlin sıpap qana qaldy. Qaısibirin aıtaıyq, bir sumdyqty bastan keshtik. Shúkir. Keshtik! Bul oqıǵanyń ótip ketkenine qudaıymyzdy úıirip otyrmyz. Degenmen halyq áli de bolsa, Jábireıil janynda turǵandaı, qalt-qult etip qadamyn áreń basýda... Esimizdi jıyp, etek-jeńimizdi qolǵa alyp úlgermedik te! Úkimet artyq-aýyz áńgimeden tezirek arylý úshin halyqty "súıegiń sol jerden shyqsyn" degendeı qaýipti aımaqqa qaıta aparyp tastady. Osyndaı sumdyqtardy bastan keshkende áldekimnen jylý men aýyz sóz demeý kútedi ekensin. "Dos-joqshylyqta synalady" demekshi Arystaǵy apatqa kórshiles Memleketterden kóńil aıtý hattary birinen keıin biri aǵylyp kelip jatyr, kelip jatyr. Onyń ózi jyrym-jyrym júregimizge az da bolsyn jamaý bolǵany jasyryn emes. Máselen, Túrkııa Prezıdenti Redjep Taııp Erdoǵan "Arys qalasyndaǵy áskerı bólimniń qoımasynda bolǵan jarylys saldarynan qaza bolǵandarǵa Alladan raqym tilep, zardap shekkenderdiń tezirek saýyǵyp ketýine tilektestik bildiremin" dese, Qyrǵyzstan Prezıdenti Sooronbaı Jeenbekov telefon arqyly tildesip, árdaıym bizben birge ekenin tilge tıek etti. Mundaı kóńil aıtý jedel-hattary jeterlik. Osy oraıda Reseı Federaııasymen ekijaqty jáne kópjaqty formattardaǵy kelissózder barysynda energetıkalyq, kóliktik, atom jáne ǵarysh salasyndaǵy birlesken jobalardy júzege asyryp, saýda-ekonomıkalyq ózara is-qımyldardy birge atqaryp júrdik. Biraq jaqynym degen saıyn alystaǵan Reseı qan jutyp otyrǵan qazaq halqyna basý aıtyp, bir japyraq qaǵazyn da joldamady. Túptep kelgende bir nandy bólisip jegen, bólisip deppin-aý, bútin nandy orystyń aýzyna salyp bergenimizge de qaramaı, Qudaıdyń bergen tegin sóziń qımaǵan Reseıdi qalaı aqtap alýǵa bolady?! Álde «qazany basqanyń – qaıǵysy basqa» degen pozıııany ustanyp júrdi me eken?! Bálkim bunyń máni biz oılaǵannan da tereńde shyǵar. Bálkim Pýtın úshin biz túkke turǵysyz el shyǵarmyz..Alaıda bizdiń prezıdentimiz Q. Toqaev kerisinshe áreket etti. Reseıde oryn alǵan Irkýtsk oblysyndaǵy sý tasqyny saldarynan adamdardyń qaıtys bolýyna baılanysty kóńil aıtyp, jedelhat joldady. Bylaısha aıtqanda, bermese de berip uıaltty. Áıtkenmen uıalyp otyrǵan Reseıdi kórgen joqpyz..Jalpy buny qalaı desek te, ne desek te túsindirýdi qajet etetin teorema bolyp tur!
Biz sengen Uly Reseı Federaııasy bundaı emes edi ǵoı...
Aqgúl AIDARBEKOVA
"Adyrna" ulttyq portaly
