Arystaǧy apattyŋ saldarynan üş adam köz jūmyp, qyryq myŋnan asa azamatymyz öz baspanasyn tastap, bas auǧan jaqqa bosyp ketıp, ana aŋyrap, bala adasyp, kürkeler qirady. Äp sätte halyq jiǧan-tergenınıŋ bärınen aiyrylyp, külın sipap qana qaldy. Qaisıbırın aitaiyq, bır sūmdyqty bastan keştık. Şükır. Keştık! Būl oqiǧanyŋ ötıp ketkenıne qūdaiymyzdy üiırıp otyrmyz. Degenmen halyq älı de bolsa, Jäbıreiıl janynda tūrǧandai, qalt-qūlt etıp qadamyn äreŋ basuda... Esımızdı jiyp, etek-jeŋımızdı qolǧa alyp ülgermedık te! Ükımet artyq-auyz äŋgımeden tezırek arylu üşın halyqty "süiegıŋ sol jerden şyqsyn" degendei qauıptı aimaqqa qaita aparyp tastady. Osyndai sūmdyqtardy bastan keşkende äldekımnen jylu men auyz söz demeu kütedı ekensın. "Dos-joqşylyqta synalady" demekşı Arystaǧy apatqa körşıles Memleketterden köŋıl aitu hattary bırınen keiın bırı aǧylyp kelıp jatyr, kelıp jatyr. Onyŋ özı jyrym-jyrym jüregımızge az da bolsyn jamau bolǧany jasyryn emes. Mäselen, Türkiia Prezidentı Redjep Taiip Erdoǧan "Arys qalasyndaǧy äskeri bölımnıŋ qoimasynda bolǧan jarylys saldarynan qaza bolǧandarǧa Alladan raqym tılep, zardap şekkenderdıŋ tezırek sauyǧyp ketuıne tılektestık bıldıremın" dese, Qyrǧyzstan Prezidentı Sooronbai Jeenbekov telefon arqyly tıldesıp, ärdaiym bızben bırge ekenın tılge tiek ettı. Mūndai köŋıl aitu jedel-hattary jeterlık. Osy oraida Resei Federasiiasymen ekıjaqty jäne köpjaqty formattardaǧy kelıssözder barysynda energetikalyq, kölıktık, atom jäne ǧaryş salasyndaǧy bırlesken jobalardy jüzege asyryp, sauda-ekonomikalyq özara ıs-qimyldardy bırge atqaryp jürdık. Bıraq jaqynym degen saiyn alystaǧan Resei qan jūtyp otyrǧan qazaq halqyna basu aityp, bır japyraq qaǧazyn da joldamady. Tüptep kelgende bır nandy bölısıp jegen, bölısıp deppın-au, bütın nandy orystyŋ auzyna salyp bergenımızge de qaramai, Qūdaidyŋ bergen tegın sözıŋ qimaǧan Reseidı qalai aqtap aluǧa bolady?! Älde «qazany basqanyŋ – qaiǧysy basqa» degen pozisiiany ūstanyp jürdı me eken?! Bälkım būnyŋ mänı bız oilaǧannan da tereŋde şyǧar. Bälkım Putin üşın bız tükke tūrǧysyz el şyǧarmyz..Alaida bızdıŋ prezidentımız Q. Toqaev kerısınşe äreket ettı. Reseide oryn alǧan İrkutsk oblysyndaǧy su tasqyny saldarynan adamdardyŋ qaitys boluyna bailanysty köŋıl aityp, jedelhat joldady. Bylaişa aitqanda, bermese de berıp ūialtty. Äitkenmen ūialyp otyrǧan Reseidı körgen joqpyz..Jalpy būny qalai desek te, ne desek te tüsındırudı qajet etetın teorema bolyp tūr!
Bız sengen Ūly Resei Federasiiasy būndai emes edı ǧoi...
Aqgül AIDARBEKOVA
"Adyrna" ūlttyq portaly
