پرەزيدەنت قاسىم-جومارت توقاەۆتىڭ توراعالىعىمەن ۇلتتىق قۇرىلتايدىڭ وتىرىسى باستالدى. قازىر قۇرىلتاي مۇشەلەرى سەكتسيالاردا ايتىلعان ۇسىنىستار مەن باستامالاردى ورتاعا سالىپ، ءوز ويلارىمەن ءبولىسىپ جاتىر, دەپ حابارلايدى «ادىرنا» ءتىلشىسى.
«العاشقى وتىرىس ۇلت ۇياسى ۇلىتاۋ جەرىندە وتسە، بىلتىر كيەلى تۇركىستاندا جينالدىق. بۇگىن تاعى ءبىر تاريحي ولكە – اتىراۋ وبلىسىنا كەلىپ وتىرمىز. ءۇشىنشى وتىرىستىڭ جايىق جاعاسىندا ءوتىپ جاتقانى تەگىن ەمەس. ايگىلى سارايشىق قالاسى وسى جەرگە ءتيىپ تۇر. بۇل شاھار ۇلىق ۇلىستىڭ، كەيىن قازاق حاندىعىنىڭ ماڭىزدى اكىمشىلىك جانە ساۋدا ورتالىعى بولعانى تاريحتان بەلگىلى»،—دەپ ءسوزىن باستادى پرەزيدەنت.
قاسىم-جومارت توقاەۆ قازاق تىلىنە دەگەن سۇرانىستىڭ جىل وتكەن سايىن ارتىپ كەلە جاتقانىن ايتتى.
«ءتىلىمىزدىڭ قولدانۋ اياسىن كەڭەيتە ءتۇسۋ مەملەكەتتىك ساياساتتىڭ باستى باعىتى بولىپ قالا بەرەدى. بۇل – ءبىز ءۇشىن مىزعىماس ۇستانىم.
ەلىمىزدە قازاق تىلىنە دەگەن سۇرانىس جىل وتكەن سايىن ارتىپ كەلەدى. قازاق ءتىلى بيزنەستىڭ، عىلىم مەن تەحنيكانىڭ تىلىنە اينالا باستادى. بۇل ءۇردىستى ودان ءارى دامىتۋدىڭ ەڭ ءتيىمدى ءارى توتە جولى – اعارتۋشىلىق.
قازىر ءىرى كىتاپ دۇكەندەرىندە قازاق تىلىندەگى تۋىندىلاردىڭ ۇلەسى ارتا ءتۇستى. سوڭعى كەزدە باسپاگەرلەردىڭ جاڭا بۋىنى الەمدىك بەستسەللەرگە اينالعان شىعارمالاردى اۋدارىپ ءجۇر. كوپتەگەن كىتاپتاردى شىعارىپ جاتىر. اۋدارىلعان كىتاپتاردىڭ ىشىندە كوركەم ادەبيەت قانا ەمەس، ىسكەرلىك باعىتتاعى تۋىندىلار دا كوپ. مەملەكەتتىك ساياساتتىڭ ءمانى – وسىندا.
ەشكىمدى ماجبۇرلەمەي، كۇندەلىكتى ومىردەگى قاجەتتىلىكتى ارتتىرۋ ارقىلى ءتىلىمىزدىڭ تۇعىرىن نىعايتا بەرەمىز. مەملەكەتتىك تىلگە قاتىستى قۇر سوزدەن ەشتەڭە شىقپايدى. ەڭ باستىسى، ناقتى ءىس بولۋى كەرەك»،—دەدى ول.
