مەملەكەت باسشىسى قاسىم-جومارت توقاەۆ التىن وردا تۋرالى حالىقارالىق ارەناداعى تۇسىنىك قازاقستانمەن تىكەلەي بايلانىستى بولۋى كەرەكتىگىن ايتتى، دەپ حابارلايدى "ادىرنا" ءتىلشىسى.
ۇلتتىق قۇرىلتايدىڭ ءۇشىنشى وتىرىسىنداعى سوزىندە پرەزيدەنت مادەني مۇرانى ساقتاپ، ونى دارىپتەۋ كەرەك ەكەنىن ايتتى.
"قازاقستان – ۇلى دالاداعى كوشپەندىلەر وركەنيەتىنىڭ تىكەلەي مۇراگەرى. جەر جۇزىنە التىن وردا دەگەن اتپەن تانىلعان ايگىلى جوشى ۇلىسى ورتالىق ەۋرازيانىڭ بايتاق دالاسىنداعى ەڭ قۋاتتى مەملەكەت رەتىندە مويىندالعان. وسى ورتاعاسىرلىق دەرجاۆانىڭ گەوساياسي مۇراسى بىرقاتار ەۋرازيا مەملەكەتىنىڭ، سونىڭ ىشىندە قازاق حاندىعىنىڭ قۇرىلۋىنا نەگىز بولدى. ۇلىق ۇلىستىڭ جەرىندە سان الۋان ەتنوس جانە ءدىن وكىلدەرى ءبىر شاڭىراقتىڭ استىندا ءومىر ءسۇردى. ءتۇرلى مادەنيەتتەر ءوزارا استاسىپ، مەملەكەت قۇرۋ ءىسىنىڭ بىرەگەي ۇلگىسى قالىپتاستى.
جوشى اۋلەتى 6 عاسىر بويى ورتالىق ەۋرازيانىڭ تاعدىرىنا تىكەلەي ىقپال ەتتى. ۇلان-عايىر اۋماقتا ءبىرتۇتاس وركەنيەت قۇرۋعا ۇمتىلدى. جوشى ۇلىسى ۇلى دالانى مەكەن ەتكەن حالىقتاردىڭ سان عاسىرلىق دامۋ باعدارىن ايقىنداپ وتىردى. ۇلىق ۇلىس مەملەكەتتى باسقارۋ ءىسىن جاڭا دەڭگەيگە كوتەردى. ونىڭ ريم يمپەرياسىمەن ۇقساستىعى دا – وسىندا", - دەدى قاسىم-جومارت كەمەلۇلى.
ودان بولەك، پرەزيدەنت التىن وردا تۋرالى حالىقارالىق ارەناداعى تۇسىنىك قازاقستانمەن تىكەلەي بايلانىستى بولۋى كەرەگىن اتاپ ءوتتى.
"بيىل جوشى ۇلىسىنىڭ نەگىزى قالانعانىنا 800 جىل تولدى. بۇگىنگى جيىنىمىز دا وسى مەرەيلى بەلەسكە تۇسپا-تۇس كەلىپ وتىر. مۇنىڭ زور سيمۆولدىق ءمانى بار. ءبىز استا-توك توي جاساۋعا ەمەس، سالماقتى زەرتتەۋ جۇرگىزۋگە باسا ءمان بەرۋىمىز كەرەك. جوشى ۇلىسى قازاقستاننىڭ مەملەكەتتىلىك داستۇرىندە ايرىقشا ورىن الادى. ەلىمىزدىڭ وتكەنى، بۇگىنى مەن بولاشاعى ونىڭ تاريحي مۇراسىمەن تىعىز استاسىپ جاتىر. ەندەشە، التىن وردا تۋرالى حالىقارالىق ارەناداعى تۇسىنىك قازاقستانمەن تىكەلەي بايلانىستى بولۋى كەرەك.
جاقىندا التىن وردانىڭ تاريحى جانە ايگىلى تۇلعالارى تۋرالى كوپ سەريالى دەرەكتى فيلم ءتۇسىرۋ ءۇشىن ءتيىستى جۇمىستار باستالدى. وعان شەتەلدىڭ تانىمال ماماندارى تارتىلىپ جاتىر. فيلم بەلگىلى حالىقارالىق پلاتفورمالار ارقىلى كورسەتىلۋى كەرەك. جالپى ەلىمىزدى الەمگە تانىتۋ ءۇشىن التىن وردا برەندىن جان-جاقتى جانە كەڭىنەن پايدالانۋ قاجەت. ونى تولىق زەرتتەۋ ءۇشىن تاباندى جۇمىس ىستەۋ كەرەك. بۇل باعىتتا ءبىراز شارۋا اتقارىلدى. مەنىڭ باستاماممەن جوشى ۇلىسىن زەرتتەيتىن عىلىمي ينستيتۋت قۇرىلدى", - دەدى مەملەكەت باسشىسى.
پرەزيدەنت قازاقستاننىڭ جەتى تومدىق جاڭا اكادەميالىق تاريحىن جازۋ ءۇشىن ناقتى جۇمىس جاسالىپ جاتقانىن ايتتى. قۇندى ەڭبەكتى جازۋ ءۇشىن 250-دەن استام عالىم، سونىڭ ىشىندە 60 شەتەلدىك مامان جۇمىلدىرىلعان.
زەرتتەۋ توبىنىڭ قاتارىندا جاقىندا ومىردەن وتكەن رەسەيدىڭ كورنەكتى تاريحشىسى ۆاديم ترەپاۆلوۆ بار.
"وكىنىشكە قاراي، ول جاقىندا ومىردەن وزدى. بىراق ۆاديم ترەپاۆلوۆ وتە قۇندى زەرتتەۋ ماتەريالدارىن ازىرلەپ، ونى كوپتومدىقتىڭ رەداكتسيالىق القاسىنا تابىستاپ كەتتى. بۇل – قازاقستان مەن رەسەيدىڭ تاريحي مەكتەپتەرى اراسىنداعى ءتيىمدى ىقپالداستىقتىڭ جارقىن كورىنىسى", - دەدى قر پرەزيدەنتى.
