Memleket basshysy Qasym-Jomart Toqaev Altyn Orda týraly halyqaralyq arenadaǵy túsinik Qazaqstanmen tikeleı baılanysty bolýy kerektigin aıtty, dep habarlaıdy "Adyrna" tilshisi.
Ulttyq quryltaıdyń úshinshi otyrysyndaǵy sózinde Prezıdent mádenı murany saqtap, ony dáripteý kerek ekenin aıtty.
"Qazaqstan – Uly daladaǵy kóshpendiler órkenıetiniń tikeleı murageri. Jer júzine Altyn Orda degen atpen tanylǵan áıgili Joshy Ulysy Ortalyq Eýrazııanyń baıtaq dalasyndaǵy eń qýatty memleket retinde moıyndalǵan. Osy ortaǵasyrlyq derjavanyń geosaıası murasy birqatar Eýrazııa memleketiniń, sonyń ishinde Qazaq handyǵynyń qurylýyna negiz boldy. Ulyq Ulystyń jerinde san alýan etnos jáne din ókilderi bir shańyraqtyń astynda ómir súrdi. Túrli mádenıetter ózara astasyp, memleket qurý isiniń biregeı úlgisi qalyptasty.
Joshy áýleti 6 ǵasyr boıy Ortalyq Eýrazııanyń taǵdyryna tikeleı yqpal etti. Ulan-ǵaıyr aýmaqta birtutas órkenıet qurýǵa umtyldy. Joshy ulysy Uly dalany meken etken halyqtardyń san ǵasyrlyq damý baǵdaryn aıqyndap otyrdy. Ulyq ulys memleketti basqarý isin jańa deńgeıge kóterdi. Onyń Rım ımperııasymen uqsastyǵy da – osynda", - dedi Qasym-Jomart Kemeluly.
Odan bólek, Prezıdent Altyn Orda týraly halyqaralyq arenadaǵy túsinik Qazaqstanmen tikeleı baılanysty bolýy keregin atap ótti.
"Bıyl Joshy ulysynyń negizi qalanǵanyna 800 jyl toldy. Búgingi jıynymyz da osy mereıli beleske tuspa-tus kelip otyr. Munyń zor sımvoldyq máni bar. Biz asta-tók toı jasaýǵa emes, salmaqty zertteý júrgizýge basa mán berýimiz kerek. Joshy ulysy Qazaqstannyń memlekettilik dástúrinde aıryqsha oryn alady. Elimizdiń ótkeni, búgini men bolashaǵy onyń tarıhı murasymen tyǵyz astasyp jatyr. Endeshe, Altyn Orda týraly halyqaralyq arenadaǵy túsinik Qazaqstanmen tikeleı baılanysty bolýy kerek.
Jaqynda Altyn Ordanyń tarıhy jáne áıgili tulǵalary týraly kóp serııaly derekti fılm túsirý úshin tıisti jumystar bastaldy. Oǵan sheteldiń tanymal mamandary tartylyp jatyr. Fılm belgili halyqaralyq platformalar arqyly kórsetilýi kerek. Jalpy elimizdi álemge tanytý úshin Altyn Orda brendin jan-jaqty jáne keńinen paıdalaný qajet. Ony tolyq zertteý úshin tabandy jumys isteý kerek. Bul baǵytta biraz sharýa atqaryldy. Meniń bastamammen Joshy Ulysyn zertteıtin ǵylymı ınstıtýt quryldy", - dedi Memleket basshysy.
Prezıdent Qazaqstannyń jeti tomdyq jańa akademııalyq tarıhyn jazý úshin naqty jumys jasalyp jatqanyn aıtty. Qundy eńbekti jazý úshin 250-den astam ǵalym, sonyń ishinde 60 sheteldik maman jumyldyrylǵan.
Zertteý tobynyń qatarynda jaqynda ómirden ótken Reseıdiń kórnekti tarıhshysy Vadım Trepavlov bar.
"Ókinishke qaraı, ol jaqynda ómirden ozdy. Biraq Vadım Trepavlov óte qundy zertteý materıaldaryn ázirlep, ony kóptomdyqtyń redakııalyq alqasyna tabystap ketti. Bul – Qazaqstan men Reseıdiń tarıhı mektepteri arasyndaǵy tıimdi yqpaldastyqtyń jarqyn kórinisi", - dedi QR Prezıdenti.
