جامبىل وبلىسىنداعى جەتىنشى سىنىپ وقۋشىسى ماتەماتيكا ءپانىنىڭ مۇعالىمىمەن جانجالداسىپ، ارتىنشا جەتكىنشەك جەدەل جاردەم كومەگىنە جۇگىنگەن، دەپ حابارلايدى "ادىرنا" ۇلتتىق پورتالى.
جەلىدە تاراعان ۆيدەونىڭ سيپاتتاماسىندا جامبىل وبلىسى مويىنقۇم اۋدانىنداعى مەكتەپتەردىڭ بىرىندە ماتەماتيكا ءپانىنىڭ مۇعالىمى ءجاسوسپىرىمدى پسيحيكالىق كۇيزەلىسكە تۇسىرگەنى ايتىلادى. جامبىل وبلىسى اكىمدىگىنىڭ ءبىلىم باسقارماسى وقيعاعا قاتىستى تۇسىنىكتەمە بەردى.
«اعىمداعى جىلدىڭ 14 ناۋرىزىندا مويىنقۇم اۋدانى ءبىلىم بولىمىنە قاراستى ايدارلى اۋىلىنداعى N2 ورتا مەكتەپتىڭ ماتەماتيكا ءپانىنىڭ مۇعالىمى مەن 7-سىنىپ وقۋشىسى اراسىندا جانجال تۋىنداپ، ناتيجەسىندە وقۋشىنىڭ دەنساۋلىعى ناشارلاپ، الدىمەن مەكتەپ مەدبيكەسى مەن اۋىلدىق دارىگەرلىك امبۋلاتوريا دارىگەرى كومەك كورسەتىپ، كەيىننەن جەدەل جاردەم شاقىرىلدى. ىشكى ىستەر قىزمەتكەرلەرى جاۋاپتى تۇلعالاردان تۇسىندىرمە حات الدى. بۇگىندە وقۋشىنىڭ جاعدايى جاقسى»، - دەلىنگەن حابارلامادا.
ءمان-جايدى انىقتاۋ ءۇشىن ءبىلىم باسقارماسى كوميسسيا قۇرىپ، ىشكى تەكسەرۋ جۇرگىزىلىپ جاتقانى ايتىلادى. قورىتىندىسى بويىنشا ءتيىستى شارالار قابىلدانىپ، جاعداي ءبىلىم باسقارماسىنىڭ قاتاڭ باقىلاۋىندا بولادى.
