الماتى وبلىسىندا جەڭىل كولىك پەن جۇك كولىگىنىڭ سوقتىعىسۋى سالدارىنان ءتورت ادام قازا تاپتى، دەپ حابارلايدى “ادىرنا” ۇلتتىق پورتالى وبلىستىق پوليتسيا دەپارتامەنتىنىڭ (پد) ءباسپاسوز قىزمەتىنە سىلتەپ.
«23 ناۋرىز كۇنى ساعات 13.45 شاماسىندا «الماتى-استانا» تاس جولىنىڭ 35-ءشى شاقىرىمىندا اۋىر سالماقتى DAF كولىگى مەن Daewoo جەڭىل كولىگىنىڭ قاتىسۋىمەن جول-كولىك وقيعاسى ورىن الدى. جول اپاتى سالدارىنان ءۇش ادام وقيعا ورنىندا كوز جۇمدى. سونداي-اق ەكى زارداپ شەگۋشى جاقىن ماڭداعى اۋرۋحاناعا جاتقىزىلدى، ولاردىڭ ءبىرى ەسىن جيماستان كوز جۇمدى»، - دەلىنگەن سەنبى كۇنى تاراتقان حابارلامادا.
حابارلامادا اتاپ وتىلگەندەي، قازىرگى ۋاقىتتا جول-كولىك وقيعاسىنا قاتىستى ساراپتاما تاعايىنداۋمەن قاتار بارلىق قاجەتتى تەرگەۋ ارەكەتتەرى جۇرگىزىلۋدە.
«مۇنداي وقيعالاردىڭ الدىن الۋ ءۇشىن وبلىس تۇرعىندارى مەن قوناقتارىن جول قوزعالىسى ەرەجەلەرىن قاتاڭ ساقتاۋدى سۇرايمىز»، - دەپ قوستى پوليتسەيلەر.
