فرانتسيا پرەزيدەنتى ماكرون «ۆيلايات حوراسان» لاڭكەستىك توبىنىڭ فرانتسيادا بىرنەشە تەراكت جاساماق بولعانىن مالىمدەدى، دەپ حابارلايدى "ادىرنا" ۇلتتىق پورتالى نەمىس تولقىنى (DW) راديوسىنا سىلتەپ.
ماسكەۋدە كروكۋس سيتي حوللدا اتىس ۇيىمداستىرىپ، جۇزدەن اسا ادامنىڭ ءومىرىن قيعان قاندى شابۋىلدى "ۆيلايات حوراسان" توبى ۇيىمداستىرعان.
قىلمىستى ءوز موينىنا العان لاڭكەستىك توپتىڭ ۇياشىعى بۇعان دەيىن دە فرانتسيادا بىرنەشە تەراكت جاساۋعا ارەكەتتەنگەن بولىپ شىقتى.
«سوڭعى ايلاردا بۇل توپ ءبىزدىڭ اۋماققا بىرنەشە رەت ارەكەت جاسادى»، - دەدى فرانتسيا پرەزيدەنتى ەممانۋەل ماكرون 25 ناۋرىز كۇنى.
ماكرون لاڭكەستىك ارەكەتتەردىڭ قاشان جانە قالاي جاسالعانى تۋرالى تولىق مالىمەت بەرمەدى. ودان بولەك فرانتسيادا جاقىن ارادا ەشقانداي لاڭكەستىك ارەكەتتەردىڭ توسقاۋىلدارى تۋرالى حابارلامالار تاراماعان.
الايدا، Crocus-قا جاسالعان شابۋىلدىڭ ەرتەڭىنە فرانتسياداعى لاڭكەستىك قاۋىپ دەڭگەيى بارىنشا جوعارىلاعانى بەلگىلى بولدى.
ال گەرمانيا ۇكىمەتى كروكۋس سيتي حوللداعى تەراكتىنى «يسلام مەملەكەتىنىڭ» اۋعانستاندىق بولىمشەسىنىڭ سودىرلارى جاسادى دەپ ەسەپتەيدى. «ۆيلايات حوراسان» توبى بۇعان دەيىن اۋعانستاننىڭ سىرتىندا بىرنەشە رەت سوققى جاساعان بولاتىن.
رەسەي پرەزيدەنتى ۆلاديمير پۋتين كروكۋس شابۋىلىنا يم-ءنىڭ جاۋاپكەرشىلىكتى موينىنا الۋىنا ازىرگە تۇسىنىكتەمە بەرمەي، وقيعانى ۋكراينامەن بايلانىستىرۋدا. دەگەنمەن كيەۆ ۇكىمەتى «كروكۋس» شابۋىلىنا قاتىسى جوق ەكەنىن ايتتى.
