بۇگىن بەلگىلى حالىق اقىنى ءارى كومپوزيتور نارتاي بەكەجانوۆتىڭ تۋعان كۇنى، دەپ حابارلايدى "ادىرنا" ءتىلشىسى.
ول 1890 جىلى 26 ناۋرىزدا قازىرگى شيەلى اۋدانىندا ومىرگە كەلگەن.
كومپوزيتور كوزىنىڭ تىرىسىندە-اق حالىقتىڭ "سۇيىكتىسى" اتانعان.
نارتاي اقىن تۋرالى جامبىل جاباەۆ:
"و، نارتاي، شەشەن تاڭداي، قاسقا ماڭداي، اۋزىڭنان شىققان ءسوزىڭ شەكەر-بالداي. ايتىسساڭ، الدىرماسسىڭ اقىندارعا، جارقىراپ قاراڭعىدا جانعان شامداي", - دەپ ولەڭ جولدارىن ارناعان.
1934 جىلى ماۋسىمدا الماتىدا حالىق ونەرپازدارىنىڭ ءبىرىنشى سلەتىندە نارتاي اقىن «زامانا بۇلبۇلى» اتتى تولعاۋىن ورىنداپ بەرگەن.
ەكى جىلدان سوڭ ماسكەۋدە قازاق ادەبيەتى مەن ونەرىنىڭ العاشقى ونكۇندىگى بولىپ، وعان جامبىل باستاعان اقىندارمەن قاتار نارتاي دا قاتىستى. ماسكەۋدەن كوڭىلدى ورالعان نارتاي شيەلى توڭىرەگىندەگى اقىن-جىرشىلار مەن ءانشى-كۇيشىلەردىڭ باسىن قۇراپ، كوركەمونەرپازدار ۇيىرمەسىن ۇيىمداستىرىپ، كوزگە تۇسە باستاعان.
نارتاي بەكەجانوۆ 1939 جىلى قازاق كسر ونەرىنە ەڭبەك سىڭىرگەن قايراتكەر اتاعىن الدى. سول جىلى كسرو جازۋشىلارى وداعىنىڭ مۇشەلىگىنە قابىلدانىپ، 1945 جىلى «قۇرمەت بەلگىسى» وردەنىمەن ماراپاتتالدى.
نارتاي اقىن 1954 جىلى 64 جاسىندا ومىردەن ءوتتى. ءارى اقىن، ءارى كومپوزيتور، ءارى ورىنداۋشى ءانشى بولا بىلگەن جارقىن تۇلعانىڭ ءومىرى – حالىققا قىزمەت ەتۋدىڭ ۇلگىسى ەدى.
