Búgin belgili halyq aqyny ári kompozıtor Nartaı Bekejanovtyń týǵan kúni, dep habarlaıdy "Adyrna" tilshisi.
Ol 1890 jyly 26 naýryzda qazirgi Shıeli aýdanynda ómirge kelgen.
Kompozıtor kóziniń tirisinde-aq halyqtyń "súıiktisi" atanǵan.
Nartaı aqyn týraly Jambyl Jabaev:
"O, Nartaı, sheshen tańdaı, qasqa mańdaı, Aýzyńnan shyqqan sóziń sheker-baldaı. Aıtyssań, aldyrmassyń aqyndarǵa, Jarqyrap qarańǵyda janǵan shamdaı", - dep óleń joldaryn arnaǵan.
1934 jyly maýsymda Almatyda halyq ónerpazdarynyń birinshi sletinde Nartaı aqyn «Zamana bulbuly» atty tolǵaýyn oryndap bergen.
Eki jyldan soń Máskeýde qazaq ádebıeti men óneriniń alǵashqy onkúndigi bolyp, oǵan Jambyl bastaǵan aqyndarmen qatar Nartaı da qatysty. Máskeýden kóńildi oralǵan Nartaı Shıeli tóńiregindegi aqyn-jyrshylar men ánshi-kúıshilerdiń basyn qurap, kórkemónerpazdar úıirmesin uıymdastyryp, kózge túse bastaǵan.
Nartaı Bekejanov 1939 jyly Qazaq KSR ónerine eńbek sińirgen qaıratker ataǵyn aldy. Sol jyly KSRO Jazýshylary odaǵynyń músheligine qabyldanyp, 1945 jyly «Qurmet belgisi» ordenimen marapattaldy.
Nartaı aqyn 1954 jyly 64 jasynda ómirden ótti. Ári aqyn, ári kompozıtor, ári oryndaýshy ánshi bola bilgen jarqyn tulǵanyń ómiri – halyqqa qyzmet etýdiń úlgisi edi.
