اباي وبلىسىنىڭ اياگوز اۋدانىندا سۋعا كەتكەن ءۇش ادام ىزدەستىرىلۋدە، دەپ حابارلايدى "ادىرنا" ۇلتتىق پورتالى وبلىس اكىمدىگىنىڭ ءباسپاسوز قىزمەتىنە سىلتەپ.
«اياگوز اۋدانىندا بىردەن ەكى باعىتتا ەكى جەدەل-ىزدەستىرۋ شاراسى جۇرگىزىلۋدە. وقيعا ورنىنا دەرەۋ اباي وبلىسى توتەنشە جاعدايلار دەپارتامەنتىنىڭ جەدەل-قۇتقارۋ جاساعىنىڭ قىزمەتكەرلەرى جونەلتىلدى»، - دەلىنگەن حابارلامادا.
«شىعىس» شارۋا قوجالىعىنان ات مىنگەن ەر ادام اياگوز وزەنىنەن ءوتىپ بارا جاتىپ قۇلاپ، سۋعا باتىپ كەتكەن.
بورلى وزەنىنەن ءوتىپ بارا جاتقان تراكتور مىنگەن ەكى ەر ادام دا سۋدا جوعالىپ كەتكەن. ولار «شالقار» شارۋا قوجالىعىنان قاراعاش اۋىلىنا قاراي بەت العان بولاتىن.
سۋ ايدىندارىنىڭ كوكتەمگى لاستانۋىنا بايلانىستى وزەن اعىنىنىڭ جىلدامدىعى مەن سۋ استىنداعى كورىنۋدىڭ ناشارلاۋىنان سۇڭگۋىر ارقىلى ىزدەۋ جۇمىستارى قيىندادى، دەپ حابارلادى اكىمدىك.
ىزدەستىرۋ جۇمىستارىنا اباي وبلىستىق توتەنشە جاعدايلار دەپارتامەنتى، پوليتسيا دەپارتامەنتى، جەرگىلىكتى پوليتسيا قىزمەتى، قورعانىس مينيسترلىگىنىڭ كۇشتەرى مەن قۇرالدارى، بارلىعى 41 ادام، 4 ءجۇزۋ كەمەسى، 5 بىرلىك تەحنيكا، 3 ۇشقىشسىز ۇشۋ اپپاراتى جۇمىلدىرىلۋدا. اياگوز اۋدانىنا پسيحولوگيالىق كومەك كورسەتۋ ءۇشىن اباي وبلىسى توتەنشە جاعدايلار دەپارتامەنتىنىڭ پسيحولوگتارى جىبەرىلدى.
سونىمەن قاتار، اياگوز اۋدانىندا اياگوز – بوزاي جەرگىلىكتى تاس جولىنىڭ 20 شاقىرىمىندا اياگوز وزەنىندەگى سۋ دەڭگەيىنىڭ كوتەرىلۋىنە بايلانىستى كوپىردىڭ جول بولىگىن شايىپ كەتكەن.
«قازىر كوپىر ارقىلى كولىك قاتىناسى جوق. شەكتەۋ بەلگىلەرى قويىلىپ، جول پوليتسياسىنىڭ باقىلاۋى ۇيىمداستىرىلدى»، - دەپ حابارلادى ۆەدومستۆودان.
تۇرعىنداردى وزەننەن وتكىزۋ ءۇشىن اۋدانعا توتەنشە جاعدايلار ءبولىمىنىڭ قىزمەتكەرلەرى جونەلتىلدى. ال اياگوز اۋدانىنىڭ اكىمدىگى جەرگىلىكتى جەردە توتەنشە جاعداي جاريالادى.
