تانىمال «Bayraktar» ۇشقىشسىز ۇشۋ اپپاراتتارىن شىعاراتىن تۇركيالىق كومپانيانىڭ تەحنيكالىق ديرەكتورى، تۇرىك كوشباسشىسى رەجەپ تايىپ ەردوعاننىڭ كۇيەۋ بالاسى سەلجۋك بايراقتار ەردوعاننىڭ پرەزيدەنتتىك مۇراگەرى بولۋى مۇمكىن. بۇل تۋرالى امەريكالىق Wall Street Journal گازەتى جازدى، دەپ حابارلايدى “ادىرنا” ۇلتتىق پورتالى.
باسىلىمنىڭ جازۋىنشا، 2023 جىلى بايراقتار WSJ-گە بەرگەن سۇحباتىندا تۇركيا پرەزيدەنتتىگىنە ۇمىتكەر بولا الاتىنىن مالىمدەگەن.
«مۇمكىن، مەن ءيا دەيمىن، بىراق بۇل جاعدايعا بايلانىستى بولادى»، – دەدى ول، ەردوعاننىڭ ودان الداعى سايلاۋعا قاتىسۋىن سۇراۋى مۇمكىن ەكەندىگىنە تۇسىنىك بەرە وتىرىپ.
بۇعان دەيىن Cumhuriyet گازەتى تۇركيادا كەزەكتەن تىس پرەزيدەنتتىك سايلاۋ وتكىزۋ تۋرالى ۇسىنىس 2027 جىلى ەل پارلامەنتىنە ءتۇسۋى مۇمكىن ەكەنىن، ول ءۇشىن بيلەۋشى كواليتسيانىڭ وپپوزيتسيامەن كەلىسۋى قاجەت ەكەنىن حابارلاعان بولاتىن.
ەردوعان بۇعان دەيىن 31 ناۋرىزدا وتەتىن مۋنيتسيپالدىق سايلاۋدى ءوزىنىڭ ساياسي مانسابىنداعى سوڭعىسى دەپ جاريالاعان. پرەزيدەنت ىستامبۇل، انكارا جانە يزمير مەرلەرىنىڭ سايلاۋىندا بيلەۋشى پارتيا وكىلدەرى جەڭىسكە جەتىپ، 1 ساۋىردە «جاڭا ءداۋىر» باستالاتىنداي ەتىپ داۋىس بەرۋگە شاقىردى.
كەيىن تۇركيا باسشىسى ادىلەت جانە دامۋ پارتياسىنىڭ رەسمي وكىلى ومەر چەليك ەردوعاننىڭ «سوڭعى سايلاۋ» تۋرالى مالىمدەمەسى ونىڭ ساياساتتان كەتۋىن بىلدىرمەيتىنىن، مۇنداي كۇن ءتارتىبى جوق ەكەنىن اتاپ ءوتتى. ءوز كەزەگىندە ادىلەت ءمينيسترى يىلماز تۋندج پارلامەنت مەرزىمىنەن بۇرىن سايلاۋ وتكىزۋ تۋرالى شەشىم قابىلداعان جاعدايدا ەردوعاننىڭ ءۇشىنشى مەرزىمگە بارا الاتىنىن مالىمدەدى.
