ءماجىلىس دەپۋتاتى جەرگىلىكتى حالىقتىڭ توپان سۋعا ءوز بەتىنشە دايىندالعانىن ايتىپ، جازبا جاريالادى، دەپ حابارلايدى "ادىرنا" ءتىلشىسى.
رينات زايىتوۆ بۇل تۋرالى ءوزىنىڭ جەلىدەگى رەسمي پاراقشاسىندا ءمالىم ەتتى.
«ەلىمىزدە بولعان توتەنشە جاعداي بىزگە ءبىراز ساباق بەردى. اپاتتارعا كەز-كەلگەن ۋاقىتتا دايىن بولۋ سونىڭ ءبىرى. اباي وبلىسى اقسۋات، كوكپەكتى اۋداندارىندا ۇلكەن زاۋالداردىڭ الدىن العانى كورىنىپ تۇر. يا، شىعىن جوق ەمەس، بار. بىراق، سالىستىرمالى تۇردە كوپ كەسەلدەن امان. ساپار بارىسىندا تۇسىنگەنىم ەڭ ءبىرىنشى جەرگىلىكتى باسشىلىق حالىقتى ۇيىمداستىرا ءبىلۋ كەرەك. ورتالىقتىڭ كومەگى كوزدى اشىپ-جۇمعانشا كەلە سالمايدى. اباي وبىلىسىنداعى جۇرت سۋدىڭ تاسۋىنا دايىندالعانى كورىنىپ تۇر. سونىڭ ارقاسىندا بىرنەشە اۋىل ىرگەسىنە كەلگەن توپان سۋدى ءوز كۇشىمەن بۇرعان. ارينە، باسى-قاسىندا جەرگىلىكتى اتقامىنەرلەر ءجۇر. شىركىن، قازاقستاننىڭ ءار اۋدانىندا وسىنداي ۇيىمشىلدىق بولعاندا عوي…", - دەدى دەپۋتات.
رينات زايىتوۆ كوپ جاعدايدا جەرگىلىكتى اكىمشىلىكتىڭ قولىن جوقتىق بايلايتىنىن دا جاسىرمادى.
"سوندا دا كورەگەن حالىق بىرلىك تانىتىپ، جۇمىلا ارەكەت جاساعان.
ەندىگى كەزەكتە توپان سۋدان زارداپ تارتقان ەلدىڭ شىعىنىن ۋاقىتىلى وتەپ، كەلەسى بولۋى مۇمكىن اپاتتارعا بارىنشا دايىندالۋ كەرەك. AMANAT پارتياسى ەلىمىزدىڭ تۇپكىر-تۇپكىرىنە ءوز وكىلدەرىن جىبەرىپ، سول ناتيجەمەن ءتيىستى جۇمىستاردى جۇرگىزۋدە. باستىسى، قانداي سىناق كەلسە دە بىرلىكتىڭ المايتىن بەلەسى جوق. وسىنى ۇمىتپايىق. ەل امان، جۇرت تىنىش بولعاي»، — دەپ جازدى ول.
