بۇگىن، 14 جەلتوقساندا اتىراۋ قالاسى مەن وبلىسىندا قاتتى ەكپىندى جەل تۇرىپ، سالدارىنان جارىق ءسوندى، سونداي-اق تۇرعىن ۇيلەردىڭ، اكىمشىلىك عيماراتتاردىڭ شاتىرى مەن سىرتقى جابىندىسى جانە بىرنەشە كولىك ءبۇلىندى، دەپ حابارلايدى "ادىرنا" پورتالى Zakon.kz سايتىنا سىلتەپ.
"اتىراۋ-جارىق" جشس ءباسپاسوز قىزمەتىنىڭ حابارلاۋىنشا، بەرەكە ىقشام اۋدانى، قارا وزەن اۋدانى، بەرەكە اۋىلىنىڭ ساياجاي ايماعى، سونداي-اق قالا ماڭىنداعى المالى اۋىلىنىڭ جەكەلەگەن كوشەلەرى جارىقسىز قالدى.
بۇعان جەلدىڭ قاتتى ەكپىنىنە بايلانىستى ەلەكتر سىمدارىنىڭ ءۇزىلۋى تۇرتكى بولدى.
"قازىرگى ۋاقىتتا وقيعا ورنىندا جەدەل-كوشپەلى بريگادالار جۇمىس ىستەپ جاتىر. ءبۇلىنۋدى جويۋ ءۇشىن ارنايى تەحنيكا، ونىڭ ىشىندە گيدراۆليكالىق كوتەرگىشتەر تارتىلعان. كەرنەۋى 0,4 كۆ جەلىلەر بويىنشا قالا جانە ەلدىمەكەندەردەن 40-قا جۋىق ءوتىنىش كەلىپ ءتۇستى، ولاردىڭ بارلىعى قارالىپ جاتىر. جەكەلەگەن كەيبىر جاعدايلاردا ەلەكترمەن جابدىقتاۋدى قالپىنا كەلتىرۋ 15 مينۋتتى قانا الادى، ال باسقالارىندا ودان دا كوپ", دەپ حابارلادى كوممۋنالدىق قىزمەتتەر.
سونىمەن قاتار، اتىراۋ وبلىسى تجد باستىعىنىڭ ورىنباسارى قىمبات كوپباەۆانىڭ مالىمەتىنشە، اتىراۋ قالاسىندا، سونداي-اق قۇرمانعازى، ماحامبەت جانە ماقات اۋداندارىندا ەكپىنى 24 م/س بولاتىن جەلدىڭ سالدارىنان 10 نىساندا، ونىڭ ىشىندە جەتى اكىمشىلىك عيماراتتا، ەكى كوپپاتەرلى تۇرعىن ۇيدە جانە ءبىر تۇرعىن ۇيدە شاتىردى جۇلىپ كەتۋ جاعدايى ترىكەلدى.
بۇلىنگەن نىسانداردىڭ قاتارىندا مەكتەپتەر، ەمحانالار، اۋىلدىق كلۋب، پەريناتالدىق ورتالىق جانە تۇرعىن ۇيلەر دە بار. سونداي-اق، عيماراتتىڭ قاسبەتىنىڭ قۇلاۋى سالدارىنان ءۇش اۆتوبۋس زاقىمداندى. تاعى ءبىر جاعدايدا جۇلىنىپ كەتكەن ءۇي شاتىرى تۇراقتاعى كولىك ۇستىنە قۇلادى. باقىتىمىزعا وراي، زارداپ شەككەندەر جوق.
سونىمەن قاتار، وبلىس پوليتسياسى قارلى بوران، قاتتى جەل جانە كوكتايعاققا بايلانىستى بىرقاتار رەسپۋبليكالىق ماڭىزى بار اۆتوموبيل جولدارىندا كولىك قوزعالىسى ۋاقىتشا شەكتەلگەنىن حابارلادى. قازىرگى ۋاقىتتا اتىراۋ – ورال، اتىراۋ – اقتوبە، سونداي-اق اتىراۋ – دوسسور-بەينەۋ اۆتوجولدارى جابىق.
"قازگيدرومەتتىڭ" 14 جەلتوقسانداعى داۋىلدى ەسكەرتۋىنە سايكەس، اتىراۋدا قار جاۋىپ، كوكتايعاق بولادى، بۇرقاسىن جۇرەدى دەپ كۇتىلەدى. باتىستان، سولتۇستىك-باتىستان سوققان جەلدىڭ ەكپىنى 15-20 م/س، كەي تۇستا 23-28 م/س دەيىن جەتەدى.
