Bügın, 14 jeltoqsanda Atyrau qalasy men oblysynda qatty ekpındı jel tūryp, saldarynan jaryq söndı, sondai-aq tūrǧyn üilerdıŋ, äkımşılık ǧimarattardyŋ şatyry men syrtqy jabyndysy jäne bırneşe kölık bülındı, dep habarlaidy "Adyrna" portaly Zakon.kz saityna sıltep.
"Atyrau-Jaryq" JŞS baspasöz qyzmetınıŋ habarlauynşa, Bereke yqşam audany, Qara özen audany, Bereke auylynyŋ saiajai aimaǧy, sondai-aq qala maŋyndaǧy Almaly auylynyŋ jekelegen köşelerı jaryqsyz qaldy.
Būǧan jeldıŋ qatty ekpınıne bailanysty elektr symdarynyŋ üzıluı türtkı boldy.
"Qazırgı uaqytta oqiǧa ornynda jedel-köşpelı brigadalar jūmys ıstep jatyr. Bülınudı joiu üşın arnaiy tehnika, onyŋ ışınde gidravlikalyq kötergışter tartylǧan. Kerneuı 0,4 kV jelıler boiynşa qala jäne eldımekenderden 40-qa juyq ötınış kelıp tüstı, olardyŋ barlyǧy qaralyp jatyr. Jekelegen keibır jaǧdailarda elektrmen jabdyqtaudy qalpyna keltıru 15 minutty qana alady, al basqalarynda odan da köp", dep habarlady kommunaldyq qyzmetter.
Sonymen qatar, Atyrau oblysy TJD bastyǧynyŋ orynbasary Qymbat Köpbaevanyŋ mälımetınşe, Atyrau qalasynda, sondai-aq Qūrmanǧazy, Mahambet jäne Maqat audandarynda ekpını 24 m/s bolatyn jeldıŋ saldarynan 10 nysanda, onyŋ ışınde jetı äkımşılık ǧimaratta, ekı köppäterlı tūrǧyn üide jäne bır tūrǧyn üide şatyrdy jūlyp ketu jaǧdaiy trıkeldı.
Bülıngen nysandardyŋ qatarynda mektepter, emhanalar, auyldyq klub, perinataldyq ortalyq jäne tūrǧyn üiler de bar. Sondai-aq, ǧimarattyŋ qasbetınıŋ qūlauy saldarynan üş avtobus zaqymdandy. Taǧy bır jaǧdaida jūlynyp ketken üi şatyry tūraqtaǧy kölık üstıne qūlady. Baqytymyzǧa orai, zardap şekkender joq.
Sonymen qatar, oblys polisiiasy qarly boran, qatty jel jäne köktaiǧaqqa bailanysty bırqatar respublikalyq maŋyzy bar avtomobil joldarynda kölık qozǧalysy uaqytşa şektelgenın habarlady. Qazırgı uaqytta Atyrau – Oral, Atyrau – Aqtöbe, sondai-aq Atyrau – Dossor-Beineu avtojoldary jabyq.
"Qazgidromettıŋ" 14 jeltoqsandaǧy dauyldy eskertuıne säikes, Atyrauda qar jauyp, köktaiǧaq bolady, būrqasyn jüredı dep kütıledı. Batystan, soltüstık-batystan soqqan jeldıŋ ekpını 15-20 m/s, kei tūsta 23-28 m/s deiın jetedı.
