ساتىبالدى كىناسىن تولىق مويىندادى

استانادا وتكەن سوت وتىرىسىندا ەكس-پرەزيدەنت نۇرسۇلتان نازارباەۆتىڭ نەمەرە ءىنىسى قايرات ساتىبالدى وزىنە تاعىلعان ايىپتى تولىق مويىندادى، دەپ حابارلايدى “ادىرنا”. استانا قالاسى قىلمىستىق ىستەر جونىندەگى اۋدانارالىق سوتىندا ءىرى مولشەردە قىلمىستىق جولمەن الىنعان اقشانى جىلىستاتۋ (قىلمىستىق كودەكستىڭ 218-بابى، 3-بولىگى، 3-تارماعى) بويىنشا ايىپتالعان قايرات ساتىبالدىعا قاتىستى تاعى ءبىر قىلمىستىق ءىس بويىنشا باستى سوت وتىرىسى ءوتتى. سوتتا پروكۋرور ەلدار نۇرماحانوۆ ايىپتاۋ اكتىسىن وقىدى. ونىڭ ايتۋىنشا، قايرات ساتىبالدى قىلمىستىق جولمەن زاڭسىز پايدا تاپقان. «قايرات ساتىبالدى ءوز ماقساتىن كوزدەپ، اقشانىڭ قىلمىستىق قۇقىقبۇزۋشىلىقتان تۇسكەنىن بىلگەن. وسىعان قاراماستان، ول «كاسپي بانكتەگى» شوتىن پايدالانىپ، 22 ملن 965 مىڭ دوللاردى دۋباي قالاسىنان جىلجىمايتىن مۇلىك ساتىپ الۋعا جۇمساعان”، – دەدى پروكۋرور. قايرات ساتىبالدى سوتقا ونلاين قاتىسىپ، كىناسىن تولىق مويىنداپ، تەرگەۋمەن كەلىسىم جاساۋعا دايىن ەكەنىن ايتتى. “قۇرمەتتى سوت، كىنامدى تولىق مويىندايمىن. دالەلدەرگە داۋلاسپايمىن. كونستيتۋتسيالىق قۇقىعىم بۇزىلمادى”، - دەدى ول. الدىن الا تىڭداۋ بارىسىندا قورعاۋشى تاراپ كىناسىن مويىنداۋ جانە زاڭسىز ساتىپ الىنعان اكتيۆتەردى قايتارۋ تۋرالى پروتسەستىك كەلىسىم جاساۋ تۋرالى ءوتىنىشحات بەردى. وسىعان بايلانىستى سوت پروتسەستىك كەلىسىمدى جاساۋ ماسەلەسىن شەشۋ ءۇشىن ۋاقىت بەردى. سوت وتىرىسى بەلگىسىز مەرزىمگە شەگەرىلدى. ايتا كەتەيىك، قايرات ساتىبالدى 2022 جىلدىڭ 26 قىركۇيەگىندە باسقا قىلمىستىق ءىسى بويىنشا التى جىلعا سوتتالعان ەدى. ال، 2024 جىلدىڭ باسىندا سىبايلاس جەمقورلىققا قارسى اگەنتتىك وعان قاتىستى تاعى ءبىر ءىس ءالى تەرگەلىپ جاتقانىن حابارلاعان بولاتىن.