تۇركىستاندا جاسوسپىرىمدەر جاپپاي توبەلەس ۇيىمداستىرعان، دەپ حابارلايدى "ادىرنا" ءتىلشىسى Tengrinews.kz-كە سىلتەپ.
قاتارلاسىن اياۋسىز سوققىعا جىققان جاسوسپىرىمدەر ءوز ارەكەتىن ۆيدەوعا ءتۇسىرىپ العان. پوليتسيا دەپارتامەنتى جەلىدە پايدا بولعان كادرعا قاتىستى پىكىر ءبىلدىردى.
وقيعا سارىاعاش اۋدانىندا بولعان. سونداي-اق، باق-تا جاراقات العان ءجاسوسپىرىمنىڭ جەتىم ەكەنى دە ايتىلۋدا.
تۇركىستان وبلىسى ءىىد ءباسپاسوز قىزمەتى سارىاعاش اۋدانىنداعى بۇزاقىلىققا قاتىستى قىلمىستىق ءىس قوزعالعانىن حابارلادى. كامەلەتكە تولماعانداردىڭ جەكە باسى انىقتالىپ، بارلىعى پوليتسيا بولىمىنە جەتكىزىلگەن.
"جابىرلەنۋشى اناسىمەن بىرگە تۇرادى. اتا-اناسى اجىراسقان. كۇدىكتىلەر سول اۋىلدىڭ تۇرعىندارى، 7-9-سىنىپ وقۋشىلارى. جانجالعا قاتىسۋشىلاردىڭ اتا-انالارى بالا تاربيەلەۋدەگى مىندەتتەرىن ورىنداماعانى ءۇشىن جاۋاپقا تارتىلادى. اۋدان اكىمدىگى جانىنداعى ارنايى كوميسسيا وتىرىسىندا ءبىلىم بەرۋ مەكەمەلەرىنىڭ باسشىلارى مەن مۇعالىمدەردىڭ جاۋاپكەرشىلىگى قارالادى. ءىس وبلىستىق ىشكى ىستەر دەپارتامەنتى باستىعىنىڭ باقىلاۋىندا»، - دەپ ءتۇسىندىردى تۇركىستان وبلىستىق پوليتسيا دەپارتامەنتىنىڭ ءباسپاسوز قىزمەتى.
