استانادا سالتانات نۇكەنوۆانى ازاپتاپ ءولتىردى دەپ ايىپتالعان قۋاندىق بيشىمباەۆقا قاتىستى سوت وتىرىسى جالعاسۋدا. بۇگىن، 3 ءساۋىر كۇنگى وتىرىس بارىسىندا «BAU» مەيرامحاناسىندا سالتانات نۇكەنوۆانىڭ سوققىعا جىعىلعان ءساتى تۇسىرىلگەن ۆيدەو كورسەتىلدى، - دەپ حابارلايدى "ادىرنا" ۇلتتىق پورتالى.
سوت وتىرىسى بارىسىندا قىلمىس ورىن العان «BAU» مەيرامحاناسىنىڭ بەينەباقىلاۋ كامەراسىنا ءتۇسىپ قالعان كادرلار كورسەتىلدى.
«ساعات 7:17-دە بيشىمباەۆ نۇكەنوۆامەن بىرگە ليفت ارقىلى ەكىنشى قاباتقا كوتەرىلدى. بيشىمباەۆ ليفتتەن شىققان كەزدە نۇكەنوۆانىڭ باسىنان بىرنەشە رەت ۇرىپ، سالدارىنان نۇكەنوۆا ەدەنگە قۇلاپ تۇسەدى. ارتىنشا بيشىمباەۆ ونى بوكسە ايماعىنان بىرنەشە رەت تەپكىلەيدى. سوسىن ول ونى شاشىنان سۇيرەپ، باسىنان قولمەن قايتا ۇردى. سوسىن تاعى دا ۇردى. ول قايتادان قۇلاپ ءتۇستى. سوسىن ارتىنشا شاشىنان كوتەرىپ الىپ، كابينكاعا سۇيرەپ اكەتتى. سوسىن تاڭعى ساعات 08:08-دە بيشىمباەۆ كابينادان جالاڭاش دەنەسىمەن شىعىپ، باردان ءسپيرتتى ءىشىپ الىپ، قايتا ورالدى. ساعات 09:27-دە بيشىمباەۆ تاعى دا جالاڭاش دەنەسىمەن جالپى بولمەگە شىعادى. 09:58 مينۋتتا بايجانوۆ مەيرامحاناعا كەلدى»، - دەپ جازدى پروكۋرور ايجان ايماعانوۆا قىلمىستىق ءىس ماتەريالدارىنداعى ۆيدەونىڭ سيپاتتاماسىندا.
ەستەرىڭىزگە سالا كەتەيىك، بۇعان دەيىن بيشىمباەۆ سوت وتىرىسىندا نۇكەنوۆانى ولەر الدىندا قالاي سوققىعا جىققانى جايلى ءوز نۇسقاسىن ايتىپ بەرگەن بولاتىن. سونداي-اق، ونىڭ ادۆوكاتتارى سوتتا جالعان دەرەك كورسەتكەنى ءۇشىن سۋديادان ەسكەرتۋ الدى. بۇدان بولەك، بيشىمباەۆتىڭ ءىنىسى، ەكىنشى ايىپتالۋشى بايجانوۆ اعاسىنىڭ ايعاقتارعا قاتىستى ۇگىتتەۋ جاساپ وتىرعانىن ايتىپ، بولەك وتىرۋدى سۇراعان بولاتىن.
