وزبەكستان پرەزيدەنتى شاۆكات ميرزيەەۆتىڭ تاپسىرماسى بويىنشا قازاقستاندا قازا تاپقان وزبەكستاننىڭ سەگىز ازاماتىنىڭ ءمايىتىن جەتكىزىپ، سونداي-اق ولاردى جەرلەۋدى ۇيىمداستىرۋمەن اينالىساتىن ۇكىمەتتىك كوميسسيا قۇرىلدى. بۇل تۋرالى وزبەكستاننىڭ توتەنشە جاعدايلار مينيسترلىگىنىڭ ءباسپاسوز قىزمەتى مالىمدەدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، مارقۇمداردىڭ دەنەسىن تاسىمالداۋ ءۇشىن وزبەكستان قورعانىس مينيسترلىگىنىڭ اسكەري ۇشاعى بولىنگەن.
«وزبەكستاننىڭ توتەنشە جاعدايلار مينيسترلىگى قازاقستاندىق ارىپتەستەرىمەن تىعىز بايلانىستا، سونداي-اق بولعان وقيعانىڭ سەبەپتەرىن زەرتتەۋدە بىرلەسىپ جۇمىس ىستەۋدە»، - دەلىنگەن حابارلامادا.
ايتا كەتەيىك، 3 ساۋىردە اقتوبە وبلىسىنىڭ سامارا-شىمكەنت تاس جولىنىڭ مارجانبۇلاق اۋىلىنىڭ ماڭىندا وزبەكستان رەسپۋبليكاسىنىڭ ازاماتى باسقارعان Volvo جۇك كولىگى مەن Toyota-Alhpard ميكرواۆتوبۋستارىنىڭ قاتىسۋىمەن جول-كولىك وقيعاسى بولعان بولاتىن. الدىن الا مالىمەت بويىنشا، وزبەكستان ازاماتتارى كەلە جاتقان Toyota ميكرواۆتوبۋسىن اقاۋلىق سالدارىنان قارسى جولاققا شىعىپ كەتكەن جۇك كولىگى قاعىپ كەتكەن.
