جەلىدە ءجاسوسپىرىم قىزدىڭ اياۋسىز سوققىعا جىعىلعانى تۇسىرىلگەن ۆيدەو تارادى، دەپ حابارلايدى «ادىرنا» ءتىلشىسى otyrar.kz-كە سىلتەمە جاساپ.
بەينەجازبادان كەلىنشەكتىڭ جاسوسپىرىمگە پىشاق الا ۇمتىلعانىن كورۋگە بولادى. ال قورعانۋعا تىرىسقان قىز جان داۋىسىمەن ايقايعا باسىپ، جىلاي باستايدى. ءجاسوسپىرىم سوققىدان قاشىپ قۇتىلۋعا تىرىسقان، الايدا ناتيجە بولماعان. بۇدان وزگە ايەل ونى جەڭىل جەيدەسىنەن ۇستاپ، جۇدىرىقپەن ۇرا باستايدى.
جاعا ۇستاتارلىق جاعداي ۇيدەگى بەينەباقىلاۋ كامەراسىنا ءتۇسىپ قالعان. ۆيدەونى رەداكتسياعا جولداعان دەرەككوزدىڭ مالىمەتىنشە، وقيعا 30 ناۋرىزدا شىمكەنت قالاسىنداعى «نۇرسات» شاعىن اۋدانىندا بولعان. ايتۋىنشا، بۇل پاتەردە مۇنداي جانجالدار ءجيى ورىن الادى.
«اناسى تۋعان قىزىنا پىشاق الا جۇگىردى. مەن ولاردىڭ كورشىسىمىن. ولار جاقىندا كوشىپ كەلگەن. كەلىنشەكتىڭ بۇدان وزگە ەكى نەمەسە ءۇش كىشكەنتاي بالاسى بار. ناقتى سانىن بىلمەيمىن. ولارعا كومەكتەسىڭىزدەرشى»، – دەپ جازدى ءانونيمدى دەرەككوز.
قالالىق پوليتسيا دەپارتامەنتى اتالعان فاكتى بويىنشا 31 ناۋرىزدا قىلمىستىق ءىس قوزعالعانىن مالىمدەدى. ۆيدەوداعى ءجاسوسپىرىم ايەلدىڭ ءبىرىنشى نەكەدەن تۋعان قىزى. ول قازىرگى ۋاقىتتا اكەسىنىڭ قامقورلىعىندا.
كەلىنشەكتىڭ قىزىنا مۇنشالىقتى قاتىگەزدىك تانىتۋىنا نە سەبەپ بولعانى بەلگىسىز. قازىرگى تاڭدا سوتقا دەيىنگى تەرگەۋ جۇمىستارى ءجۇرىپ جاتىر.
«پوليتسيا قىزمەتكەرلەرى بەينەجازبادا كورسەتىلگەن تۇلعالاردى انىقتادى. اتالعان فاكتى بويىنشا 2024 جىلدىڭ 31 ناۋرىزىندا قىلمىستىق ءىس قوزعالدى. تەرگەۋ شارالارى جۇرگىزىلۋدە. ساراپتاما تاعايىندالدى. بۇل ءىس شىمكەنت قالالىق پب باستىعىنىڭ باقىلاۋىندا»، – دەدى پوليتسيا دەپارتامەنتى.
