رەسەيدە سۋ تاسقىنى ەندى باستالعان سياقتى. ونىڭ بىزگە اسەرى بار ما؟ رەسەيدىڭ بىزبەن شەكارالاس ايماقتارىنىڭ اۋا رايى بىزدەن سۋىق بولعاندىقتان، مۇز بەن قار ەندى ەرىپ، وزەن سۋلارى ەندى كوتەرىلە باستاعانداي. كۇنى كەشە عانا ورىنبور وبلىسىنىڭ ورسك قالاسىنداعى سۋ قويماسى جارىلىپ كەتىپ، ورسك قالاسىن سۋ شايا باستادى. بۇل قالا ءبىزدىڭ شەكارامىزدان 15-18 شاقىرىمدا جاتىر ەكەن. ەداۋىر ۇلكەن قالا ەكەن، 150 مىڭنان استام تۇرعىنى بار. قالانىڭ ءۇش اۋدانىنىڭ ەكەۋى سۋ استىنا كەتەتىن قاۋىپ بار. تۇندە سۋ باسقاندا ءۇش ادام كوز جۇمىپ، 6 ادام جوعالىپ كەتىپتى. 4 مىڭنان استام ءۇي ءبىر تۇندە سۋعا كەتكەن.
ورسك قالاسى عانا ەمەس، ورىنبور قالاسىنىڭ شەتكەرى اۋداندارىنا دا سۋ كىرە باستاعان. مىڭداعان ادامدى قاۋىپسىز ايماققا كەتۋگە شاقىرۋدا. كوشكىسى كەلمەيتىندەردى پوليتسيامەن كۇشتەپ ەۆاكۋاتسيالاۋ باستالعان.
بۇل ەكى قالا دا ۋرال وزەنىنىڭ بويىندا جاتىر. ۋرالىمىز جايىق قوي. وزدەرى دە يايك دەيتىن، قازىر ۋرال دەيدى. وزەننىڭ سۋى قازىر 9,3 مەترگە جەتكەن، تۇندە عانا 7 مەتر ەدى. سۇمدىق سۋ كەلىپ جاتىر. بۇل سۋ قازاقستانعا جەتە مە، جوق پا بەلگىسىز. تجم ورسك دامباسىنىڭ جارىلۋىنان تۋىنداعان سۋ قازاقستانعا جەتە قويمايتىنىن ايتقان، رەسەيلىك ساراپشىلار دا سولاي دەيدى. الايدا جايىق سۋىنىڭ كوتەرىلۋى اسەر ەتۋى مۇمكىن-اۋ. وعان قاتتى دايىندالۋ قاجەت.
جالپى رەسەي ايماقتارىنداعى سۋ تاسقىنى سولتۇستىگىنە قاراي جىلجىپ بارادى ەكەن. ويتكەنى اۋا رايى وڭتۇستىكتەن سولتۇستىككە قاراي جىلىنىپ كەلەدى. چەليابى، التاي، ومبى، سامارا، ءنوۆوسىبىر ايماقتارىندا دا سۋ تاسقىنى باستالعان. وزەندەر سۋى كوتەرىلىپ جاتىر ەكەن. رەسەي اقپارات كوزدەرى ورىنبور ايماعىنداعى سۋ تاسقىنىن سوڭعى ءبىر عاسىردا بولماعان تاسقىن دەپ جازۋدا. ماري ەلدە دە سۋ قويماسى جارىلعان دەگەن اقپارات بار، الايدا بۇل ناقتى ەمەس.
Ashat Kasengali
