سۋ تاسقىنى سالدارىنان 88 مىڭعا جۋىق ادام ەۆاكۋاتسيالاندى، دەپ حابارلايدى "ادىرنا" ءتىلشىسى.
ەلىمىزدىڭ سۋ باسقان وڭىرلەرىندە ادامداردى قاۋىپسىز جەرلەرگە ەۆاكۋتسيالاۋ جانە توپان سۋمەن كۇرەس جۇمىستارى جالعاسىپ جاتىر.
«سۋ تاسقىنى بويىنشا ساعات 16:00 جاعداي، ازاماتتىق قورعاۋ قىزمەتىنىڭ كومەگىمەن 88 مىڭعا جۋىق ادام، ونىڭ ىشىندە 30 مىڭعا جۋىق بالا ەۆاكۋتسيالاندى. قازىر ۋاقىتشا ورنالاسۋ پۋنكتتەرىندە 7 مىڭنان استام ادام، ونىڭ ىشىندە 3700 بالا بار جانە 4800 ادام ۇيىنە ورالدى. سونداي-اق، 82 315 ءۇي جانۋارى قاۋىپسىز جەرگە ايدالدى. اۆاريالىق قۇتقارۋ جۇمىستارىنا 23 مىڭنان استام ادام جانە 2500-گە جۋىق تەحنيكا، 448 سۋ سورۋ، 131 سۋدا ءجۇزۋ تەحنيكاسى جانە 6 اۋە كەمەسى جۇمىلدىرىلعان»، - دەدى توتەنشە جاعدايلار مينيسترلىگى ازاماتتىق قورعانىس جانە اسكەري بولىمدەر كوميتەتىنىڭ اعا وفيتسەرى ەراسىل سايپاش بريفينگ بارىسىندا.
سوڭعى تاۋلىكتە توتەنشە جاعدايلار مينيسترلىگىنىڭ جەكە قۇرامىنان 525 ادام مەن 100-گە جۋىق تەحنيكا الماتى قالاسىنان قاراعاندى، ۇلىتاۋ جانە پاۆلودار وبلىستارىنا جىبەرىلگەن.
«توتەنشە جاعدايلار مينيسترلىگى جەرگىلىكتى اتقارۋشى ورگانداردىڭ كۇشىمەن 8 ملن-نان استام تەكشە مەتر ەرىگەن قار سۋى سورىلدى. 1 ملن 200 مىڭعا جۋىق قۇم سالىنعان قاپ جانە 1 ملن توننادان استام ينەرتتى ماتەريالدار توسەلدى»، - دەدى تجم وكىلى.
