دالامىزدى سۋ باسىپ، توتەنشە جاعداي تۋىنداعان شاقتا العاشقى بولىپ كومەك قولىن قىرعىز باۋىرلار سوزدى.
ءساۋىردىڭ 6-ى كۇنى قىرعىزستاننان شىققان 15 كولىك اتىراۋ، اقتوبە، قوستاناي جانە ءبىزدىڭ وڭىرگە ءبولىندى. ءساۋىردىڭ 9-ى كۇنى گۋمانيتارلىق كومەك تيەلگەن 4 جۇك كولىگى ورال قالاسىنا كەلىپ توقتادى.
تۋىس ەل باسىنا كۇن تۋعاندا جايبىراقات جاتا الماعان ايىر قالپاقتى اعايىندى كوپپەن بىرگە قارسى العان وبلىس اكىمىنىڭ ورىنباسارى باقىتجان نارىمبەتوۆ 3000 شاقىرىمنان استام جولدى ارتقا تاستاپ، قىرعىز ەلىنىڭ اماناتىن جەتكىزگەن اعايىنعا العىسىن ءبىلدىردى.
–العاشقى بولىپ كومەك قولىن سوزعان كورشىلەس قىرعىز ەلىنەن حالىقارالىق گۋمانيتارلىق كومەك اقجايىق وڭىرىنە جەتتى. قيىن كەزدە قولۇشىن سوزعان اعايىننىڭ بۇل جاقسىلىعىن قازاق ەلى ەش ۋاقىتتا ۇمىتپايدى. عاسىرلار بويعى ەكى ەل اراسىنداعى باۋىرلاستىق نىعايا ءتۇستى دەپ سانايمىن. التى الاشتىڭ ۇلدارى باۋىرلاستىعىن الەمگە تاعى ءبىر مارتە پاش ەتتى. ءتىلىمىز ءبىر، ءدىلىمىز ءبىر، ءدىنىمىز ءبىر قىرعىز اعايىنعا قازاق ەلى اتىنان ايتار العىسىمىز شەكسىز،-دەدى ب. نارىمبەتوۆ.
ودان سوڭ باقىتجان حابەرۇلى قىرعىز كوشىن باستاپ كەلگەن زاميربەك نارچاەۆقا "قىرعىز ەلىنە باتىس قازاقستان حالقىنىڭ اتىنان مىڭ العىس" دەگەن جازۋى بار دومبىرانى سىيعا تارتتى.
باۋىرلاس ەل اماناتىن ورالعا جەتكىزگەن قىرعىز رەسپۋبليكاسى توتەنشە جاعداي مينيسترلىگىنىڭ پودپولكوۆنيگى زاميربەك نارچاەۆتىڭ ايتۋىنشا، قازاق باسىنا قيىندىق تۇسكەنىن ەستىگەن بويدا قىرعىز ەلى جۇدىرىقتاي جۇمىلىپ، گۋمانيتارلىق از عانا ۋاقىت ىشىندە كومەك جيناپ تاستاعان.
–پرەزيدەنتىمىزدىڭ تاپسىرماسى بويىنشا قىرعىزستان ەلىنەن قازاقستانعا ازىق-تۇلىك، توسەك-كورپە، كەرۋەت، سۋسىن، تۇرمىسقا قاجەتتى زاتتار جەتكىزدىك. قازاق-قىرعىز ءبىر تۋعان. قيىن جاعدايعا تاپ بولعان قازاق جۇرتىنا جالپى 300 توننادان استام گۋمانيتارلىق كومەك جىبەرىلدى. باتىس قازاقستانعا 80 تونناسى ءبولىندى -, دەدى زاميربەك نارچاەۆ.
سىن ساعاتتا قولداۋىن بىلدىرگەن كورشى ەل جۇگىن جەتكىزگەن ازاماتتارعا قر پارلامەنتى ءماجىلىسىنىڭ دەپۋتاتى ابزال قۇسپان دا ەل العىسىن جەتكىزىپ، قازاق ەلىنىڭ ريزاشىلىعىن ءبىلدىردى.
– اعايىننىڭ قامقورلىعىن باسىڭا ءىس تۇسكەندە بىلەرسىڭ،-دەيدى. وزگەدەن بۇرىن كومەك قولىن سوزعان اعايىنعا رازىمىز. بۇل جاي عانا كومەك ەمەس دوستىعىمىزدىڭ نىعايىپ، اعايىندىعىمىزدىڭ بەكي تۇسكەنىنىڭ كورىنىسى. بولاشاقتا دا ەكى ەل اراسىنا سىزات تۇسپەسىن،-دەدى ا.قۇسپان.
ودان سوڭ اقساقال قانات ورازعاليەۆ كومەكتى جەتكىزگەن جاندارعا اق باتاسىن بەردى.
تۇگەلباي بيسەن
