رەسەي پرەزيدەنتىنىڭ وكىلى قورعان جانە تۇمەن وبلىستارىنداعى سۋ تاسقىنىنا قازاقستاندى كىنالادى، دەپ حابارلايدى "ادىرنا" ءتىلشىسى ربك-عا سىلتەپ.
ءپۋتيننىڭ ورال فەدەرالدى وكرۋگىندەگى وكىلەتتى وكىلى ياكۋشەۆ قورعان جانە تۇمەن وبلىستارىنداعى سۋ تاسقىنىن بولدىرماۋ ءۇشىن قازاقستان ءوزىنىڭ سۋ قويمالار جۇيەسىنە سۋدى «كەلىسىلگەن تۇردە جىبەرۋگە مىندەتتى ەدى" دەگەن پىكىر بىلدىرگەن. ونىڭ ايتقانى قازاقستان وسىلاي جاساماعان سوڭ قورعان مەن تۇمەن جەرىن سۋ الىپ كەتتى دەگەنگە سايادى. سوڭىنان ول ءسوزىنىڭ ءلامىن جۇمسارتقانداي جالپىلاما سويلەگەن.
«بىزدە وسىنداي قىس بولعان كەزدە جانە قاردىڭ مولشەرى ايتارلىقتاي كوپ بولسا، سۋ قويماسىندا جەتكىلىكتى مولشەردە سۋ جينالاتىن بولسا، ءبىزدىڭ ارىپتەستەرىمىزبەن [قازاقستاندىق] وسى ماسەلە بويىنشا جۇمىس ىستەۋىمىز كەرەك»، - دەدى ياكۋشەۆ ربك تەلەارناسىنداعى سۇحباتىندا.
ونىڭ ايتۋىنشا، الداعى ۋاقىتتا قازاقستاندا اعىندى سۋلاردى رەتتەۋ ارقىلى بىرنەشە اۋماقتا سۋ تاسقىنى ماسەلەسىن بولدىرماۋعا بولادى.
ال وسى ۋاقىتتا قورعان تۇرعىندارى «ۇلكەن سۋعا» دايىندالۋدا. ياكۋشەۆ قابىلدانعان شارالار اپاتتى جەڭۋگە «100%» كومەكتەسەتىنىنە كەپىلدىك بەرمەدى دەگەن.
ءپۋتيننىڭ ورال فەدەرالدى وكرۋگىندەگى وكىلەتتى وكىلىنىڭ ايتۋىنشا، قورعان وبلىسىنداعى توتەنشە جاعدايدى شەشكەننەن كەيىن قۇتقارۋشىلار سۋ تاسقىنى بولۋى مۇمكىن تۇمەن وبلىسىنا جىبەرىلەدى.
ال ناۋرىز ايىنىڭ ورتاسىنان باستاپ قازاقستاندا ەلدى مەكەندەردى سۋ تاسقىنى باستادى. ەلدىڭ بىرنەشە ايماعىندا جەرگىلىكتى توتەنشە جاعداي جاريالاندى. رەسپۋبليكا پرەزيدەنتى قاسىم-جومارت توقاەۆ ولاردى سوڭعى 80 جىلداعى ەڭ ءىرى تابيعي اپات دەپ اتاعان بولاتىن. ال رەسەيدە سوڭعى 100 جىلدا بۇرىن سوڭدى بولماعان تاسقىن جايىندا ايتىلادى.
