بۇگىن اقوردادا پرەزيدەنت قاسىم-جومارت توقاەۆتىڭ توراعالىعىمەن عىلىم جانە تەحنولوگيالار جونىندەگى ۇلتتىق كەڭەستىڭ وتىرىسى ءوتىپ جاتىر، دەپ حابارلايدى «ادىرنا» ءتىلشىسى اقورداعا سىلتەمە جاساپ.
جيىندا مەملەكەت باسشىسى ەلدەگى قازىرگى احۋالعا توقتالدى.
«جاعدايدى كورىپ، ءبىلىپ وتىرسىزدار، ايماقتاردا سەكسەن جىل بولماعان جويقىن سۋ تاسقىنى بولىپ جاتىر. كوپتەگەن ەلدى مەكەندى قارعىن سۋ باستى. جالپى احۋال وتە كۇردەلى.
قازىر ۇكىمەت بارلىق قاجەتتى شارالاردى جەدەل تۇردە قابىلداپ جاتىر. ءتيىستى تاپسىرمالاردى بەردىم، جاعدايدى باقىلاۋدا ۇستاپ وتىرمىز. تابيعاتتىڭ توسىن مىنەزىنەن باسقا دا ەلدەر زارداپ شەگۋدە. الەمنىڭ ءار تۇكپىرىندە جەر سىلكىنىسى، ءورت، سۋ تاسقىنى بولىپ جاتىر. ءبىر سوزبەن، جاھاندىق كليمات وزگەرىپ، تابيعي اپاتتار جيىلەپ كەتتى. مۇنداي اپاتتاردىڭ الدىن الىپ، ازاماتتاردىڭ اماندىعىن قامتاماسىز ەتۋ – اسا ماڭىزدى مىندەت. عىلىم – بۇل مىندەتتى ىسكە اسىرۋدىڭ بىردەن-ءبىر جولى»،—دەدى ول.
قاسىم-جومارت كەمەلۇلى قازاقستاندا ونداعان جىل بويى عىلىمعا جەتە ءمان بەرىلمەگەنىن اتاپ ءوتتى.
«اسىرەسە، ەلىمىزدە بولىپ جاتقان سۋ تاسقىنى كەزىندە بىلىكتى ماماندار مەن عالىمداردىڭ تاپشىلىعى ايقىن سەزىلىپ وتىر. مەن عىلىمدى دامىتۋ تۋرالى ۇنەمى ايتىپ ءجۇرمىن. ارينە، عىلىمدى ءبىر كۇندە نەمەسە ءبىر جىلدا دامىتىپ جىبەرۋ مۇمكىن ەمەس. ۇزاق ۋاقىت تاباندى جۇمىس ىستەۋ كەرەك.
وكىنىشكە قاراي، قازاقستاندا ونداعان جىلدار بويى عىلىمعا جەتە ءمان بەرىلگەن جوق. شىنىن ايتۋ كەرەك. ەلىمىزدىڭ بۇرىنعى عىلىمي الەۋەتى مەن ينفراقۇرىلىمىن جوعالتىپ الدىق. 40 مىڭ عالىم 90-شى جىلدارداعى قيىن كەزەڭدە عىلىمنان مۇلدە قول ءۇزدى. كەيبىر ينستيتۋتتار ساقتالىپ قالعانىمەن، جالپى عىلىم ءبىرتۇتاس جۇيە رەتىندە قاتتى السىرەپ كەتتى. وسىنىڭ سالدارى ەندى كورىنىپ جاتىر. ءبىز ەلىمىزدىڭ عىلىمي الەۋەتىن قالپىنا كەلتىرۋىمىز كەرەك.
ال سۋ تاسقىنىنا ورالساق، الدىمىزدا تۇرعان مىندەتتەر – وتە كۇردەلى، اۋقىمدى. اپاتتان زارداپ شەككەن ازاماتتارعا بارلىق قاجەتتى جاعدايدى جاساۋىمىز كەرەك. بۇل – قوماقتى قاراجاتتى تالاپ ەتەتىن جۇمىس. بىراق ءبىز حالىقتىڭ الدىنداعى مىندەتتەمەلەرىمىزدى تولىعىمەن ورىندايمىز. بۇل – پارىز. مەن ءۇشىن بۇل – ەڭ ماڭىزدى جانە ءدال قازىرگى كەزدەگى ەڭ قاجەتتى جۇمىس»،—دەدى پرەزيدەنت.
