پرەزيدەنت قاسىم-جومارت توقاەۆ ساحا رەسپۋبليكاسىنىڭ باسشىسى ايسەن نيكولاەۆتى قابىلدادى. بۇل تۋرالى اقوردا مالىمدەدى، دەپ حابارلادى “ادىرنا” ۇلتتىق پورتالى.
مەملەكەت باسشىسى قازاقستان مەن ساحا (ياكۋتيا) رەسپۋبليكاسىنىڭ سان قىرلى بايلانىستارى قارقىندى دامىپ كەلە جاتقانىن اتاپ ءوتتى. ءوزارا تاۋار اينالىمىنىڭ ايتارلىقتاي ارتۋى – سونىڭ ايقىن دالەلى.
ء"بىز ءوزارا قارىم-قاتىناس پەن ىنتىماقتاستىق پەرسپەكتيۆالارىنا زور ىقىلاسپەن قارايمىز. ءسىزدىڭ رەسپۋبليكاڭىزعا، ياكۋت حالقىنا دەگەن قۇرمەتىمىز ەرەكشە. قوس حالىققا ورتاق دۇنيەلەر كوپ. سىزبەن بىرگە قۇرامىندا ىسكەرلىك توپتار مەن مادەنيەت وكىلدەرى بار ۇلكەن دەلەگاتسيا كەلگەنىن ايرىقشا اتاپ وتكىم كەلەدى", – دەدى قاسىم-جومارت توقاەۆ.
پرەزيدەنت قازاقستاندا ساحا رەسپۋبليكاسىنىڭ كۇندەرىن وتكىزۋ باستاماسىن قولدادى. ونىڭ اياسىندا مادەني جانە سپورتتىق شارالار ۇيىمداستىرۋ، ياكۋتيانىڭ ينۆەستيتسيالىق، تۋريستىك الەۋەتىن تانىستىرۋ جوسپارلانعان.
ال ايسەن نيكولاەۆ كورسەتكەن سىي-قۇرمەتى ءۇشىن قاسىم-جومارت توقاەۆقا العىس ايتىپ، ساحا رەسپۋبليكاسى مەن قازاقستان اراسىنداعى قارىم-قاتىناستىڭ جاندانا تۇسكەنىن جەتكىزدى.
سونداي-اق ول قازاقستان حالقىنا قولداۋ كورسەتىپ، سۋ تاسقىنى سالدارىنان تۋىنداعان بارلىق قيىندىقتى تەزىرەك ەڭسەرۋگە تىلەكتەستىك ءبىلدىردى.
ء"بىز قازاقستانعا ساحا رەسپۋبليكاسىنىڭ كۇندەرىن وتكىزۋ ماقساتىندا كەلدىك. استانا مەن الماتى قالالارىندا مادەني، سپورتتىق، ىسكەرلىك باعىتتا كوپتەگەن شارا ۇيىمداستىرۋ جوسپارلانعان", – دەدى ايسەن نيكولاەۆ.
كەزدەسۋ بارىسىندا اۋىل شارۋاشىلىعى، كەن ءوندىرۋ ونەركاسىبى، تسيفرلاندىرۋ جانە تۋريزم سالالارىنداعى ىنتىماقتاستىقتىڭ پەرسپەكتيۆتى باعىتتارى تالقىلاندى.
بۇدان بولەك، قازاقستان مەن رەسەي ەكى ەلدىڭ وڭىرارالىق ىقپالداستىعىن جان-جاقتى دامىتۋعا باسا ءمان بەرەتىنى اتالىپ ءوتتى.
