سۋ تاسقىنىنان زارداپ شەككەن ورىنبور تۇرعىندارى پرەزيدەنت ۆلاديمير ءپۋتيننىڭ بۇرىنعى كۇزەتشىسى الەكساندر كۋرەنكوۆ باسقاراتىن توتەنشە جاعدايلار مينيسترلىگىن كوزبوياۋشىلىق جاسادى دەپ ايىپتاۋدا. جەرگىلىكتى بيلىك وكىلدەرىمەن كەزدەسۋدە ازاماتتار تجم-نەن ءتيىستى كومەك الا الماعاندارىنا نارازى بولدى، دەپ حابارلايدى “ادىرنا” ۇلتتىق پورتالى استرا سايتىنا سىلتەپ.
تۇرعىنداردىڭ ايتۋىنشا، دەپارتامەنت وكىلدەرى تەك تەلەديداردان «ادەمى كورىنىس» كورسەتۋ ءۇشىن سيۋجەتتەر تۇسىرۋمەن عانا اينالىسادى.
«جەتى كۇن ۇيىقتامادىم، ال تجم ەشتەڭە ىستەپ جاتقان جوق. وتىرىپ الىپ ءبالىش جەۋدەن باسقا تۇك بىتىرمەدى. مىنە، تەلەديداردا ولاردىڭ جۇمىس ىستەپ جاتقانىن كورسەتەتىن ادەمى سۋرەتتەر بار. تۇك تە ىستەپ جاتقان جوق! حالىقتى اشىندىرماڭدار. ءبىز ءبارىڭدى ايىرمەن ايداپ توزاققا تۇسىرەمىز »، - دەدى زارداپ شەككەندەردىڭ ءبىرى.
The Moscow Times بۇعان دەيىن حابارلاعانداي، توتەنشە جاعدايلار مينيسترلىگىندە ءبىر اي بۇرىن ورىنبور وبلىسىندا كۇتىلەتىن كۇشتى سۋ تاسقىنى تۋرالى اقپارات تاراعان بولاتىن. جايىق وزەنىندەگى سۋ دەڭگەيىن رەتتەپ، يريكلينسك سۋ قويماسىنداعى تاسقىن سۋلارعا الدىن الا ورىن بوساتىپ، تاسقىننىڭ شىعىنىن ازايتۋعا مۇمكىندىك بولعان. الايدا، اپاتتىڭ الدىن الۋ ءۇشىن ەش شارا قولدانىلماعان.
ورىنبور وبلىسىندا سۋ تاسقىنىنىڭ كۇردەلى دەڭگەيى ساقتالۋدا. سەنبى كۇنى تاڭەرتەڭ ورىنبور ماڭىنداعى جايىق وزەنى ارناسىنان اسىپ 12 213 تۇرعىن ءۇي مەن 17 203 شارۋاشىلىق تەلىمىن باسىپ قالدى. سۋ تاسقىنى 5 ساۋىردە ورسك قالاسىندا بوگەتتىڭ بۇزىلۋىنان باستالدى. الايدا توتەنشە جاعدايلار مينيسترلىگىنىڭ باسشىسى اپات ايماعىنا ءپۋتيننىڭ جەكە بۇيرىعىنان كەيىن 7-ءى كۇنى عانا بارعان.
