قازاقستان پرەزيدەنتى ارمەنيا پرەمەر-مينيسترىمەن شاعىن قۇرامدا كەلىسسوز جۇرگىزدى. بۇل تۋرالى اقوردا جاريالادى، دەپ حابارلايدى “ادىرنا” ۇلتتىق پورتالى.
قاسىم-جومارت توقاەۆ بۇل رەسمي ساپارىنا ەرەكشە ءمان بەرەتىنىن جانە ونى ەكىجاقتى قارىم-قاتىناستاردى دامىتۋدىڭ ماڭىزدى كەزەڭىنە جول اشاتىنىن اتاپ ءوتتى. قازاقستان پرەزيدەنتى ەكى ەل اراسىنداعى بايلانىستاردىڭ بارلىق باعىتى بويىنشا ىنتىماقتاستىقتى ارتتىرۋ ءۇشىن مول الەۋەت بار ەكەنىن ايتتى.
نيكول پاشينيان ءوزارا بايلانىستاردىڭ قارقىندى دامىپ كەلە جاتقانىنا توقتالىپ، ارميان-قازاق قاتىناستارىن جاڭا دەڭگەيگە كوتەرۋ ءۇشىن بىرلەسە ارەكەت ەتۋگە دايىن ەكەنىن مالىمدەدى.
كەلىسسوز بارىسىندا قاسىم-جومارت توقاەۆ پەن نيكول پاشينيان ساۋدا-ەكونوميكالىق، كولىك-ترانزيتتىك، ينۆەستيتسيالىق، وڭىرلىك جانە مادەني-گۋمانيتارلىق ىنتىماقتاستىق ماسەلەلەرىن تالقىلادى. تاراپتار وڭىرلىك تۇراقتىلىق جانە قاۋىپسىزدىك ماسەلەلەرىنە ايرىقشا نازار اۋداردى.
شاعىن فورماتتا وتكەن كەلىسسوز سوڭىندا قاسىم-جومارت توقاەۆ پەن نيكول پاشينيان قازاقستان مەن ارمەنيا اراسىنداعى كوپقىرلى بايلانىستاردى ودان ءارى نىعايتۋعا بەيىلدى ەكەنىن راستادى.
اتاپ ايتقاندا، قازاقستان پرەزيدەنتىنىڭ ەرەۆانعا رەسمي ساپارى اياسىندا مىناداي قۇجاتتارعا قول قويىلدى:
- قازاقستان ۇكىمەتى مەن ارمەنيا ۇكىمەتى اراسىنداعى كوشى-قون سالاسىنداعى ىنتىماقتاستىق تۋرالى كەلىسىم;
- قازاقستان ۇكىمەتى مەن ارمەنيا ۇكىمەتى اراسىنداعى ازاماتتاردىڭ ساپارلارى مەن بولۋ ءتارتىبى تۋرالى كەلىسىم;
- 2006 جىلعى 6 قاراشاداعى قازاقستان ۇكىمەتى مەن ارمەنيا ۇكىمەتى اراسىنداعى حالىقارالىق اۆتوموبيل قاتىناسى تۋرالى كەلىسىمگە وزگەرىستەر مەن تولىقتىرۋلار ەنگىزۋ تۋرالى حاتتاما;
- قازاقستان مەن ارمەنيانىڭ اۆياتسيالىق بيلىگى اراسىنداعى ءوزارا تۇسىنىستىك تۋرالى مەموراندۋم;
- قازاقستاننىڭ ماڭعىستاۋ وبلىسى اكىمىنىڭ اپپاراتى مەن ارمەنيانىڭ ارماۆير وبلىسى اكىمشىلىگى اراسىنداعى ىنتىماقتاستىق تۋرالى مەموراندۋم;
- قازاقستاننىڭ شىمكەنت قالاسى مەن ارمەنيانىڭ ۆانادزور قالاسى اراسىنداعى ىنتىماقتاستىق جانە باۋىرلاستىق قارىم-قاتىناس ورناتۋ تۋرالى مەموراندۋم;
- قازاقستاننىڭ تۋريزم جانە سپورت مينيسترلىگى مەن ارمەنيانىڭ ءبىلىم، عىلىم، مادەنيەت جانە سپورت مينيسترلىگى اراسىنداعى 2024-2026 جىلدارعا ارنالعان ىنتىماقتاستىق باعدارلاماسى;
- قازاقستان ۇكىمەتى مەن ارمەنيا ۇكىمەتى اراسىنداعى ساۋدا-ەكونوميكالىق ىنتىماقتاستىق جونىندەگى 2024-2025 جىلدارعا ارنالعان جول كارتاسى;
- قازاقستاننىڭ تسيفرلىق دامۋ، يننوۆاتسيالار جانە اەروعارىش ونەركاسىبى مينيسترلىگى مەن ارمەنيانىڭ جوعارى تەحنولوگيالىق يندۋستريا مينيسترلىگى اراسىنداعى اقپاراتتىق كوممۋنيكاتسيالىق تەحنولوگيالار سالاسىنداعى ىنتىماقتاستىق تۋرالى ءوزارا تۇسىنىستىك تۋرالى مەموراندۋم;
- استانا مەن ەرەۆان اراسىنداعى باۋىرلاستىق قارىم-قاتىناس ورناتۋ تۋرالى مەموراندۋم.
ايتا كەتەيىك، بۇگىن قاسىم-جومارت توقاەۆ ارمەنياعا رەسمي ساپارمەن باردى. ارمەنيانىڭ مەملەكەتتىك رەزيدەنتسياسىندا ەرەۆانعا رەسمي ساپارمەن كەلگەن قازاقستان پرەزيدەنتىن سالتاناتتى تۇردە قارسى الۋ ءراسىمى ءوتتى.
