اقمولا وبلىسى ستەپنوگور قالاسىنا قاراستى بەستوبە كەنتىندەگى كوپقاباتتى ۇيدە ناتاليا ونيششۋك ەسىمدى جالعىزباستى ايەل 10 جىلدان بەرى اجەتحانادا تۇرادى. بۇل تۋرالى Massaget.kz پورتالى جازدى، دەپ حابارلايدى “ادىرنا” ۇلتتىق پورتالى.
اقپاراتقا سايكەس، ۇيدە جىلۋدىڭ مۇلدە جوقتىعىنان زەينەتكەر ايەل ۆاننانىڭ ۇستىنە توسەك سالىپ، اۋىر كۇندەردى باستان كەشۋگە ءماجبۇر.
جالعىزباستى قاريا كومەگىن بەرەر ءتىرى جان بولماعان سوڭ مۇزداي باسپانادا جىلدار بويى بۇرسەڭدەپ تۇرىپ جاتقانىن جەتكىزدى. ءۇيىنىڭ ءىشى تۇگەلدەي ىلعال باسىپ سىز تارتقان ءۇيدىڭ باسقا بولمەلەرىندە تۇرۋ مۇلدە مۇمكىن ەمەس. سوندىقتان قاريا جىلىتقىش الىپ اجەتحانانىڭ كىشكەنتاي عانا بولمەسىندە تۇراتىن بولعان. بۇگىن دە جەتپىستەن اسقان قاريا اششى مۇڭىن جەتكىزدى.
"مەن بۇل ۇيدە سوناۋ ءۇي سالىنعان 1984 جىلدان بەرى تۇرامىن. باستاپقىدا ۇيگە ورتالىقتاندىرىلعان جىلۋ بەرىلگەن. بىراق كەيىن جىلۋدان ءبىرجولا اعىتىلدى. ءبىرشاما ۋاقىت اتا-اناممەن بىرگە جەر ۇيدە تۇردىم. سودان تاعى قايتىپ ورالدىم. قازىر مىنە ون جىلدان بەرى تەك اجەتحانا بولمەسىندە تۇرىپ جاتىرمىن. قالعان بولمەلەر جىلىتىلماعاندىقتان ايازدى كۇندەرى مۇزداي بولىپ سۋىپ كەتەدى. قابىرعالار سىز تارتقاندىقتان تورعايداي بولىپ ساڭىراۋقۇلاقتار قاپتاپ كەتتى. اس ۇيگە بارىپ تاماق دايىنداسام قابىرعالاردان ساۋلاپ سۋ اعادى. كوكتەم سايىن كۇن جىلىعاندا ىلعي تەرەزەلەردى اشىپ كەپتىرىپ الماق بولامىن. بىراق ودان ەش قايىر جوق. قىسى-جازى وسى كىشكەنتاي عانا اجەتحانا بولمەسىندە ۆاننانىڭ ۇستىنە توسەك سالىپ جاتامىن. يت تىرلىكپەن ءومىر كەشىپ ءجۇرمىن", - دەيدى ناتاليا ونيششۋك پورتالعا بەرگەن سۇحباتىندا.
فوتو: massaget.kz
قاريانىڭ اكەسى سوعىس ارداگەرى بولعان. اتا-اناسى قايتىس بولعاننان كەيىن تۇرمىستىڭ تاۋقىمەتىن تارتا باستاعان قاريا ءوزىنىڭ اششى تاعدىرىن ەشكىمگە جاريا ەتپەي تۇرا بەرگەن. ءارى سىز باسىپ ساڭىراۋقۇلاق قاپتاعان ۇيدە تۇراتىنىن بىرەۋگە ايتۋدى دا ار ساناعانىن جاسىرمادى. الايدا، ابدەن شەگىنە جەتكەن ايەل وزىندەگى بار تۇيتكىلدى وسى بەستوبە كەنتىنەن سايلانعان دەپۋتات - قانات بايسوۆقا جەتكىزگەنىن ايتتى.
ناتاليا پروكوفەۆنانىڭ ايانىشتى جاعدايىن ءماسليحات دەپۋتاتى دا راستادى. ونىڭ ايتۋىنشا، بەستوبە كەنتىندە بۇدان دا بولەك الەۋمەتتىك ماسەلەلەر جەتىپ ارتىلادى.
"مەن ناتاليا پروكوفەۆنانىڭ ۇيىندە اقپان ايىندا بولدىم. ۇيدە جارتى ساعات تا تۇرا الماي، اياق كيىمىمدى كيىپ شىعىپ كەتۋگە ءماجبۇر بولدىم. شىنىن ايتقان ونىڭ ۇيىنەن دالا الدەقايدا جىلى سياقتى سەزىلدى. وڭمەنىڭنەن وتەتىن مۇزداي سۋىقپەن قاتار ءۇيدىڭ ءىشى سىز باسىپ ىلعالدان دەمالۋ اسا قيىنعا سوعاتىنىن كوردىم. بۇل كىسىنىڭ اناسى بىزگە مەكتەپتە ساباق بەرەتىن. اۋىل اكىمىنە جاعدايدى ايتتىم. بىراق ەشقانداي ناقتى كومەك بەرە المادى. وتە ايانىشتى جاعداي. كەنتتە جىلۋ، جول، اۋرۋحانا، جەدەل جاردەم سياقتى وتە وتكىر ماسەلەلەر كوپ. جاعدايى وسىنداي اسا اۋىر حالدەگى ادامدار بار. دەگەنمەن كەلەسى قىستا بۇل كىسىنىڭ باسپاناسىنا پەش سالىناتىنى حاق. بۇل ماسەلە مەنىڭ ۇدايى نازارىمدا بولادى", - دەدى ستەپنوگور قالالىق ءماسليحاتىنىڭ دەپۋتاتى قانات بايسوۆ.
ەلدىمەكەننىڭ كوپ بولىگىندە كوپ قاباتتى تۇرعىن ۇيلەرگە جىلۋ تارتىلماعاندىقتان كەنت تۇرعىندارىنىڭ باسىم بولىگى ۇيلەرىنە پەش سالىپ العان. قىزىعى سول شاعىمدانعان ايەل تۇراتىن ءدال وسى ۇيدە بەستوبە كەنتىنىڭ اكىمى دە تۇراتىن بولىپ شىقتى.
"كورشىلەرىمنىڭ ءبارى ۇيلەرىنە پەش قويدىرىپ العان. كومىر جاعىپ كۇنەلتەدى. ولاردىڭ بارىندە ۇيىندە ەركەگى، قولىندا اقشاسى بار. ال مەندە ونىڭ ءبىرى جوق. جاقىندا اكىمگە دە بارىپ جاعدايىمدى ايتقانمىن. تىم قۇرىعاندا ستەپنوگوردا جاتاقحانادان ءبىر بولمە بەرە مە دەپ ۇمىتتەنگەنىم راس. بىراق جاۋاپ مەنىڭ پاتەرىم بار ەكەنى تۋرالى بولدى. اكىم مەنىڭ جاعدايىما مۇسىركەگەندەي قاراعانىمەن ۇيگە بۋ گەنەراتورىن قويىپ الۋعا كەڭەس بەردى. بىراق مەنىڭ ونداي اقشام جوق. 100 مىڭ تەڭگە زەينەتاقىم تەك ازىق-تۇلىك پەن ءدارى-دارمەگىمە جانە كوممۋنالدىق قىزمەتتەردى تولەۋگە عانا جەتەدى. سىزدەر حابارلاسىپ ماسەلە كوتەرگەننەن كەيىن اكىم ۇيىمە كەلىپ، جاعدايىمدى بىلگەن بولدى", - دەيدى ناتاليا ونيششۋك.
قاريا كەنت اكىمىمەن ءبىر كوپ قاباتتى ۇيدە تۇرعانىمەن كەنت اكىمى وسى ۋاقىتقا دەيىن قاريا جايلى ەش بىلمەيتىن بولىپ شىقتى. سونداي-اق، بەستوبە اكىمى الداعى جىلعا دەيىن جەرگىلىكتى كاسىپكەرلەردىڭ كومەگىمەن ناتاليا ونيششۋككە پەش سالۋ ماسەلەسى شەشىلەتىنىن اتاپ ءوتتى.
"ەكى جىل بويى وسى بەستوبە كەنتىنە اكىم بولعالى ول تەك ءبىر-اق رەت كەلىپ جۇگىندى. تەك سوندا عانا وسى جاعدايدى ەستىدىم. مەن ءوز تاراپىمنان دانەكەرلەۋ جانە پەش ورناتۋ جۇمىستارىنا جۇمىسشىلارىمدى ءبولۋدى ۇسىندىم. مەملەكەت تاراپىنان مۇنداي جاعدايعا قاراجات قاراستىرىلماعان. سوندىقتان بيىل جەكەمەنشىك كاسىپكەرلەردى تاۋىپ قارياعا پەش سالىپ بەرەتىن بولدىق. دەمەۋشى بولاتىن كاسىپكەر تاپتىق. ەندى بيىل جازدا بۇل ماسەلە شەشىمىن تابۋى ءتيىس", - دەدى بەستوبە كەنتىنىڭ اكىمى سىرىم قاباي.
