تالدىقورعاندا جەڭىس ساياباعى اۋماعىندا «تازا قازاقستان» اكتسياسىنا وراي سەنبىلىك شاراسى ءوتتى. وعان انتيادرولىق قوزعالىس بەلسەندىلەرى، مۇگەدەكتەر مەن «سەمەي پوليگونى» قب جانە «جەتىسۋ ءوڭىرىنىڭ چەرنوبىل اپاتىنان زارداپ شەككەندەر وداعى» قب ارداگەرلەرى قاتىستى.
ءدال وسى جەردەن ءبىر جىل بۇرىن بارلىق سەمەي مەن چەرنوبىل قۇرباندارىن ەسكە الۋعا ارنالعان ەسكەرتكىش ورناتىلعان ەدى. وبلىستىق ارداگەرلەر جانە مۇگەدەكتەر قوعامىنىڭ جەتەكشىسى مۇستافا قۇسايىنوۆ:
– وتكەن جىلى 15 قىركۇيەكتە وبلىستىق اكىمدىكتىڭ قولداۋىمەن ەسكەرتكىش اشىلدى. وبلىستا «سەمەي»، «چەرنوبل» اپاتىنىڭ زاردابىن شەككەن ازاماتتار كوپ. بۇگىنگى قايىرىمدى ىسكە ارداگەرلەر دە ءوز ۇلەسىن قوسىپ، جاس ۇرپاققا پاتريوتتىق تاربيەنىڭ نەگىزىن كورسەتۋدە. رەسپۋبليكا بويىنشا «تازا قازاقستان» ەكولوگيالىق اكتسياسىنىڭ «كيەلى مەكەن» اتاۋىمەن ءوتىپ جاتقان تازالىق اكتسياسىنىڭ ماڭىزى وتە زور. ءبىز ءوز تاراپىمىزدان ءاربىر ەسكەرتكىش كيەلى مەكەن ساناتىنا جاتادى. سول سەبەپتى دە سەمەي، چەرنوبل ارداگەرلەرى اكتسياعا بەلسەنە اتسالىسىپ، تازالىق جۇمىستارىن اتقارۋدامىز. ءدال وسىنداي شارا وبلىستىڭ بارلىق اۋدانىندا ءوتىپ جاتىر جانە وعان اۋداندىق ارداگەرلەر دە اتسالىسۋدا.
ارداگەرلەردىڭ سوزىنە سۇيەنەتىن بولساق بۇل جۇمىسقا جۇيەلى تۇردە قاتىسىپ، ەكولوگيالىق تازالىقپەن قاشان دا بىرگە ەكەندىكتەرىن كورسەتتى. ەسكەرتكىش ماڭايى تولىقتاي قوقىستان تازارتىلىپ، قالاعا كورىك بەرەتىن نىساننىڭ كەلبەتى تۇرعىنداردىڭ كوڭىلىنە قۋانىش سىيلايتىنداي.
