بۇگىندە ىشكىلىككە سىلقيا تويىپ الىپ قوعامدىق ورىندا ويران سالاتىندارعا، وتباسىنىڭ شىرقىن بۇزاتىندارعا جازا قاتاڭ. ايتسە دە، مۇنداي جاندار كوبىنەسە ءماجبۇرلى ەمدەۋدەن باس تارتىپ، جاۋاپكەرشىلىكتەن جالتارادى. مۇنداي جاعدايدا زارداپ شەگۋشڭ ماسكۇنەمدى ەرىكسىز ەمدەۋگە جىبەرۋ جايلى ىشكى ىستەر ورگانىنا ارىز جازۋعا قۇقى بار.
باتىس قازاقستان وبلىسى بويىنشا ەكى ۋاقىتشا بەيىمدەۋ جانە دەتوكسيكاتسيا ورتالىعى بار، ياعني ورال قالاسىندا جانە ءبورلى اۋدانى اقسايقالاسىندا. ورال قالاسىندا ورنالاسقان ۋاقىتشا بەيىمدەۋ جانە دەتوكسيكاتسيا ورتالىعى 50 ورىندىقلايىقتالسا, ال اقساي قالاسىنداعى 10 ورىندىق جاساقتالعان.
اعىمداعى جىلى ۋاقىتشا بەيىمدەۋ جانە دەتوكسيكاتسيا ورتالىعىنا 2880 ازامات جەتكىزىلىپ، ونىڭ ىشىندە 1801 ازامات ورنالاستىرىلعان. باتىس قازاقستان وبلىسى بويىنشا ماسكۇنەمدىكتەن، ناشاقورلىقتان ماجبۇرلەپ ەمدەۋ مەكەمەسى بار. مەكەمە 170 ورىنعا ارنالعان. كۇنى بۇگىندە ماس كۇيىندە جاسالعان قىلمىستىڭ الدىن الۋ ماقساتىندا ارنايى مەكەمەگە ماجبۇرلەپ ەمدەۋگە 40 ماسكۇنەم جانە ناشاقور راسىمدەلگەن. بۇل تۋرالى پد جەرگىلىكتى پوليتسيا قىزمەتى باسقارماسىنىڭ اعا ينسپەكتورى، پوليتسيا مايورى تلەكتەس كاجكەەۆتەن سۇراپ بىلگەن ەدىك.
– اعىمداعى جىلى ماس كۇيىندە جاسالعان قىلمىستار ءتورت پايىزعا تومەندەپ وتىر. وتكەن جىلى 126 قىلمىس ورىن السا، قازىرگى تاڭدا 121قىلمىس تىركەلدى. قوعامدىق ورىندا الكوگولدىك ىشىمدىك ءىشىپ، ماس كۇيىندە جۇرگەنى ءۇشىن 1800 اكىمشىلىك حاتتاما تولتىرىلدى. ماسكۇنەمدىكتەن جانە ناشاقورلىقتان ەمدەۋگە جىل باسىنان بەرى 40 تۇلعا راسىمدەلىپ، قازىر ءماجبۇرلى ەمدەلۋدە. زاڭمەن بەلگىلەنگەن ورىنداردا تەمەكى ونىمدەرىن شەككەنى ءۇشىن 68 ازاماتقا اكىمشىلىك حاتتاما تولتىرىلدى، –دەيدى پوليتسيا مايورى تلەكتەس قۇرمانعازىۇلى.
كەيىپكەرىمىزدىڭ مالىمەتىنشە، ماسكۇنەمدى ماجبۇرلەپ ەمدەۋگە تۋىستارى قارسى بولاتىن دا كورىنەدى. ويتكەنى تۋىستارى تۇزەلەمىن دەگەن قۇر ۋادەسىنە سەنىپ قالادى. ماسەلەن، ورال قالاسىنىڭ 50 جاسار تۇرعىنى ىشىمدىككە ابدەن تاۋەلدىلىكتەن، ۇيىندەگى زاتتارىن ساتا باستاعان. جۇبايى پوليتسياعا سان مارتە ارىز جازعانىمەن، كەشىرىم بەرىپ، ابدەن شەكتەن شىققاندا عانا التى اي ماجبۇرلەپ ەمدەۋگە كەلىسىپتى. قازىر ۋاقىتشا بەيىمدەۋ جانە دەتوكسيكاتسيا ورتالىعىندا ەم قابىلداپ ءجۇر. الايدا، تۋىستارى «اۋرۋىنان» تولىق ايىعىپ شىعارىنا كۇماندى. ورتالىق ماماندارى ماسكۇنەمدىككە سالىنعان جاندى تەزىرەك ەمدەتۋ كەرەك ەكەنىن ايتىپ دابىل قاعادى. ولاردىڭ ايتۋىنشا، ىشىمدىككە تاۋەلدى ادامداردىڭ بۇل دەرتتەن ءوز ەركىمەن ايىعۋلارى قيىن.
سونداي-اق كۇنى بۇگىندە سپيرتتىك ىشىمدىك ءىشىپ، كولىك جۇرگىزەتىندەر سانى كۇرت ارتىپ وتىر. ناتيجەسىندە، سوڭى ولىممەن اياقتالعان قانشاما جول اپاتى ورىن الدى. جول-كولىك وقيعالارىن ازايتۋ جانە جول-كولىك وقيعالارىنىڭ الدىن الۋ ماقساتىندا باتىسقازاقستاندىق پوليتسەيلەر جول قوزعالىسى ەرەجەلەرىن بۇزۋ فاكتىلەرىن انىقتاۋ جانە جولىن كەسۋ جۇمىستارىن ءۇزىلىسسىز جالعاستىرۋدا. وسى ماقساتتا قالالىق دەپارتامەنت جەكە قۇرامىنىڭ جۇمىلۋىمەن «ماس جۇرگىزۋشى – قىلمىسكەر!» رەيدتىك ءىس-شارالارى تۇراقتى تۇردە وتكىزىلىپ تۇرادى. اتاپ ايتقاندا, اعىمداعى جىلدىڭ باسىنان بەرى 339 تۇلعا ۇستالىپ، جۇرگىزۋشى كۋالىگىنەن ايىرىلعان.
جاقىندا بقو پوليتسيا قىزمەتكەرلەرى كولىك قۇرالىن ماس كۇيلەرىندە باسقارعان ەكى جۇرگىزۋشىنى ۇستادى. ماسەلەن، بقو پد پاترۋلدىك پوليتسيا باتالونىنىڭ قىزمەتكەرلەرى «ورال-اتىراۋ» تاس جولىندا چاپاەۆ كەنتى تۇرعىنىنىڭ ماس كۇيىندە كولىك جۇرگىزگەن «ۆاز-21012» اۆتوكولىگىن توقتاتادى.
سونداي-اق ورال ق.پب پاترۋلدىك پوليتسيا باتالونىنىڭ قىزمەتكەرلەرى پاترۋلدەۋ كەزىندە ورال قالاسىنداعى ءازىربايجان كوشەسىنىڭ بويىندا «BMW» ماركىلى اۆتوكولىگى توقتاتادى، ونىڭ جۇرگىزۋشىسى ەسىرتكىگە ماس كۇيدە بولعان. ايتا كەتۋ كەرەك، ەكى جۇرگىزۋشى دە كولىك ايداۋ قۇقىعىنان ايىرىلعان.
قازىرگى ۋاقىتتا ەكى جۇرگىزۋشى دە ۋاقىتشا ۇستاۋ يزولياتورىنا قاماۋعا الىندى، ال كولىكتەرى ارنايى تۇراققا قويىلدى. جۇرگىزۋشىلەرگە قاتىستى قىلمىستىق ءىس قوزعالدى. تەرگەۋ امالدارى جۇرگىزىلۋدە. بۇل – ءبىر عانا مىسال.
عالامتور دەرەكتەرىنە سۇيەنسەك، ەلىمىزدە 46 مىڭداي جەتىم بالا بولسا، 16 مىڭىنىڭ اتا-اناسى ءىشىمدىككە سالىنۋى سەبەپتى اتا-انالىق قۇقىنان ايىرىلعان. ال اراققا سالىنۋدىڭ سالدارىنان جىل سايىن 28 مىڭ ادام باۋىر، جۇرەك-قان تامىرلارى، اسقازان جاراسى ءتارىزدى دەرتتەردى اسقىندىرىپ الىپ، كوز جۇمادى. جول-كولىك اپاتى وقيعالارىنىڭ دا 50 پايىزى ىشىمدىكتىڭ سالدارىنان. بۇل كورسەتكىش اراق پەن تەمەكىگە قاتىستى زاڭدى كۇشەيتۋ كەرەك ەكەنىنە ناقتى كوزىمىزدى جەتكىزىپ وتىر.
تەپسە تەمىر ۇزەتىن ازاماتتاردىڭ قۋ اراقتىڭ قۇلىنا اينالعانىن كوزىڭ كورىپ، ەرىكسىز ويلاناسىڭ! الكاگول ونىمدەرىن جارنامالاۋعا، ساۋدالاۋعا تىيىم سالىنسا دەگەن وي مازالايدى. يت تە ىشپەيتىن اششى سۋدىڭ قوعامىمىزعا ابدەن ءسىڭىپ كەتكەنىنە ناليسىڭ. قوعامدى ورىن الىپ جاتقان ءتۇرلى كەلەڭسىز وقيعالار، وزبىرلىق ارەكەتتەردىڭ 90 پايىزىنا سەبەپ ىشىمدىك ەكەنىن بىلە تۇرا كوز جۇما قارايمىز. قىلمىسكەردىڭ جازاسىن ايىپپۇلمەن عانا شەكتەيمىز! ويلانارلىق جاعداي!
