وڭتۇستىكتە 22 جاستاعى تۇرعىنعا قىزعالداق تەرگەنى ءۇشىن ميلليون تەڭگەگە جۋىق ايىپپۇل سالىنۋى مۇمكىن، دەپ حابارلايدى “ادىرنا” ءتىلشىسى.
بۇل تۋرالى تۇركىستان وبلىستىق پد مالىمدەدى.
تۇركىستان وبلىسى ورداباسى اۋدانىنىڭ 22 جاستاعى تۇرعىنى قىزىل كىتاپقا ەنگەن جانە زاڭمەن قورعالعان قىزعالداقتى تەرگەن.
ستۋدەنت-قىز جوعالىپ كەتۋ قاۋپى ءتونىپ تۇرعان گرەيگ قىزعالداقتارىن تەرگەن ءساتىن ۆيدەوعا ءتۇسىرىپ، جەلىگە جۇكتەگەن.
"ول ۇيالىجار اۋىلدىق وكرۋگىندە ورنالاسقان دالادا قىزىل كىتاپقا ەنگەن گۇلدەردى جۇلىپ، ۆيدەوعا ءتۇسىرىپ، ءوز پاراقشاسىنا جاريالادى. سيرەك كەزدەسەتىن جانە قۇرىپ كەتۋ قاۋپى بار وسىمدىك تۇرلەرىن الۋ دەرەگى پوليتسيا بولىمىندە تىركەلگەن. بارلىق ءمان-جايى انىقتالىپ جاتىر", - دەدى وبلىستىق پد ءباسپاسوز قىزمەتى.
ەسكە سالا كەتكيىك، توبەشىكتىڭ كوركىنە اينالعان قىزعالداق قىزىل كىتاپقا ەنگەن وسىمدىك. وسىمدىكتى جۇلعان جاعدايدا زاڭدا ايىپپۇل قاراستىرىلعان.
