تبيليسيدە گرۋزيا پارلامەنتى عيماراتىنىڭ ماڭىندا «شەتەل اگەنتتەرى» تۋرالى زاڭ جوباسىنا نارازىلىق بىلدىرۋشىلەر شەرۋگە شىقتى. ولارعا قارسى ارنايى جاساق 16 ساۋىردە تەحنيكالىق كۇش قولداندى، دەپ حابارلايدى “ادىرنا” پورتالى.
ارنايى جاساق پەن نارازىلىق بىلدىرۋشىلەر اراسىنداعى قاقتىعىس پلەنارلىق وتىرىس اياقتالماي جاتىپ، توڭىرەكتەگى كوشەلەردەگى پارلامەنتتەن شىعا بەرىستە باستالدى.
تبيليسيدە «شەتەلدىك اگەنتتەر تۋرالى زاڭعا» قارسى نارازىلىق اكتسياسىندا 14 ادام ۇستالدى. پارلامەنتتە توبەلەس كەزىندە
ىشكى ىستەر مينيسترلىگى زاڭسىز ارەكەتتەردىڭ جولىن كەسۋ ءۇشىن بۇرىش سپرەيىن قولدانعانىن مالىمدەدى.
ۆەدومستۆونىڭ مالىمدەۋىنشە، نارازىلىق بىلدىرۋشىلەر پوليتسياعا ءتۇرلى زاتتار، سونىڭ ىشىندە تاستار مەن بوتەلكەلەر لاقتىرعان، سونىڭ سالدارىنان ىشكى ىستەر مينيسترلىگىنىڭ ءبىر قىزمەتكەرى جارالانىپ، دەپارتامەنتتىڭ كولىگى زاقىمدانعان.
ناتيجەسىندە ىشكى ىستەر مينيسترلىگى اكىمشىلىك قۇقىق بۇزۋشىلىق جاساعان 11 ادامنىڭ ۇستالعانىن حابارلادى. ءبىر كۇن بۇرىن 14 ادام ۇستالعان بولاتىن.
«ميتينگتى ۇيىمداستىرۋشىلار مەن قاتىسۋشىلاردى زاڭدا كوزدەلگەن تارتىپتە نارازىلىق ءبىلدىرۋدى قامتاماسىز ەتۋگە تاعى دا شاقىرامىز. ءاربىر زاڭسىز ارەكەتتەن كەيىن ءتيىستى قۇقىقتىق جاۋاپ بەرىلەدى»، - دەلىنگەن ءىىم حابارلاماسىندا.
ەستەرىڭىزگە سالا كەتەيىك، وسىدان ەكى كۇن بۇرىن 15 ساۋىردە گرۋزيا پارلامەنتىندە شەتەلدىك اگەنتتەر تۋرالى زاڭ جوباسىن تالقىلاۋ كەزىندە جاپپاي توبەلەس ورىن العان بولاتىن. توبەلەس سوڭى نارازىلىق شەرۋىنە جالعاستى.
