پرەزيدەنت قاسىم-جومارت توقاەۆ يراكلي كوباحيدزەمەن جۇرگىزگەن كەلىسسوزدەردە مۇناي ماسەلەسى تالقىلاندى، دەپ حابارلايدى "ادىرنا" ءتىلشىسى.
پرەزيدەنت قازاقستاننىڭ باكۋ – تبيليسي – دجەيحان مۇناي قۇبىرى ارقىلى مۇناي تاسىمالىنىڭ كولەمىن ارتتىرۋعا نيەتتى ەكەنىن مالىمدەدى.
كەلىسسوزدەرگە ەكى ەلدىڭ رەسمي دەلەگاتسيالارى قاتىسىپ، ساياسي، ساۋدا-ەكونوميكالىق جانە مادەني-گۋمانيتارلىق ىنتىماقتاستىقتى كەڭەيتۋ ماسەلەلەرى تالقىلاندى.
مەملەكەت باسشىسى قازاقستاننىڭ گرۋزيانى وڭتۇستىك كاۆكازداعى ۋاقىت سىنىنان وتكەن سەنىمدى سەرىكتەسى رەتىندە جوعارى باعالايتىنىن اتاپ ءوتتى. ونىڭ ايتۋىنشا، ەكى ەلدى تاريحي تامىرى، ورتاق مادەني قۇندىلىقتارى جانە حالىقتار اراسىنداعى بەرىك بايلانىس بىرىكتىرەدى.
پرەزيدەنت قول قويىلعان ستراتەگيالىق ارىپتەستىك ورناتۋ تۋرالى بىرلەسكەن مالىمدەمە قازاقستان مەن گرۋزيا اراسىنداعى قارىم-قاتىناستى جاڭا ساپالى دەڭگەيگە كوتەرەتىنىنە سەنىم ءبىلدىردى.
مەملەكەت باسشىسىنىڭ ايتۋىنشا، ساۋدا-ينۆەستيتسيالىق ىنتىماقتاستىق ەكىجاقتى قاتىناستاردىڭ نەگىزى بولىپ قالا بەرەدى. قازاقستان گرۋزيا ەكونوميكاسىنا 500 ميلليون اقش دوللارىنان استام ينۆەستيتسيا قۇيىپ، ەلدەگى ءىرى ينۆەستورلاردىڭ ءبىرى سانالادى. سونىمەن قاتار تاراپتار ەنەرگەتيكا سالاسىنداعى ارىپتەستىكتى ودان ءارى نىعايتۋعا ۋاعدالاستى.
ءوز كەزەگىندە يراكلي كوباحيدزە قازاقستاندى ورتالىق ازياداعى سەنىمدى سەرىكتەس دەپ اتاپ، قاسىم-جومارت توقاەۆتىڭ باسشىلىعىمەن ەلدىڭ ايتارلىقتاي جەتىستىكتەرگە قول جەتكىزگەنىن ايتتى. ول ستراتەگيالىق ارىپتەستىك تۋرالى بىرلەسكەن مالىمدەمە ەكى ەل اراسىنداعى ىنتىماقتاستىققا جاڭا مۇمكىندىك اشاتىنىن جەتكىزدى.
كەزدەسۋ بارىسىندا مەملەكەت باسشىسى ستراتەگيالىق ارىپتەستىكتى ودان ءارى دامىتۋ ءۇشىن ەنەرگەتيكا، ينۆەستيتسيا، كولىك-لوگيستيكا، اۋىل شارۋاشىلىعى، تسيفرلاندىرۋ، تۋريزم جانە وزگە دە پەرسپەكتيۆالى باعىتتاردى قامتيتىن ارنايى «جول كارتاسىن» ازىرلەۋدى ۇسىندى.
تاراپتار ترانسكاسپي حالىقارالىق كولىك باعىتى اياسىنداعى ىنتىماقتاستىقتى جالعاستىرۋعا دا ەرەكشە نازار اۋداردى. وسىعان بايلانىستى كولىك-لوگيستيكالىق ينفراقۇرىلىمدى دامىتۋ، كونتەينەرلىك تاسىمالدى كەڭەيتۋ، تاريفتىك ساياساتتى ۇيلەستىرۋ جانە تسيفرلاندىرۋدى جەدەلدەتۋ جونىندە بىرلەسكەن جۇمىستار جۇرگىزىلمەك.
بۇدان بولەك، قازاقستان گرۋزيالىق ستارتاپتار مەن تەحنولوگيالىق كومپانيالاردىڭ Astana Hub باعدارلامالارىنا قاتىسۋىن قولدايتىنىن مالىمدەدى. كەزدەسۋدە دەنساۋلىق ساقتاۋ، ءبىلىم، مادەنيەت جانە تۋريزم سالالارىنداعى ارىپتەستىكتى دامىتۋ ماسەلەلەرى دە قاراستىرىلدى.
