قازاقستاندا اي-92 بەنزينىنە تاۋلىگىنە 100 ليترگە دەيىن شەكتەۋ ەنگىزىلمەك. شەتەلدىكتەر ءۇشىن وتىننىڭ بۇل ءتۇرى ايتارلىقتاي قىمباتتايدى، ال ديزەل، كەرىسىنشە، ارزاندايدى، دەپ حابارلايدى “ادىرنا” ۇلتتىق پورتالى kوlecا kz-كە سىلتەپ.
وتاندىق جانارماي بەكەتتەرىندەگى ساتىلاتىن بەنزين مەن ديزەلدىڭ شەكتى باعاسى تۋرالى بۇيرىققا تۇزەتۋلەردى ەنەرگەتيكا مينيسترلىگى دايىندادى. قۇجاتقا سايكەس، تومەندەگى باعامەن ساتپاقشى:
اي-80 ءليترى — 89 تەڭگە;
اي-92 جانە اي-93 ءليترى — 245 تەڭگە، ال قازاقستاندا بەرىلگەن جۇرگىزۋشى كۋالىگىن كورسەتكەندە، تاۋلىگىنە 100 ليترگە دەيىن ءليترىن 205 تەڭگەگە الۋعا بولادى.
ارنايى كولىك، جۇك كولىگى جانە اۆتوبۋس جۇرگىزۋشىلەرى قازاقستاننىڭ جۇرگىزۋشى كۋالىگىن جانە تەحپاسپورتىن كورسەتكەن جاعدايدا تاۋلىگىنە 300 ليترگە دەيىن قۇيۋعا رۇقسات بەرىپ، بەنزيننىڭ ءبىر ءليترىن 205 تەڭگەدەن ساتپاقشى.
وسىنداي شەكتەۋلەر ديزەلدى كولىكتەرگە دە قاتىستى. شەتەلدىكتەرگە جازعى جانە ماۋسىمارالىق ديزەلدى 315 تەڭگەدەن، ال جەرگىلىكتى حالىققا 295 تەڭگەدەن، بىراق جەڭىل كولىك ءۇشىن كۇنىنە 100 ليتر ليميت، ارنايى كولىك، جۇك كولىگى مەن اۆتوبۋس ءۇشىن كۇنىنە 300 ليتر ساتۋ ۇسىنىلادى.
ەل ازاماتتارى ءۇشىن اي-92 ماركالى بەنزين مەن ديزەل وتىنىنىڭ باعاسى ءبىر جىل بۇرىن ۇكىمەت بەكىتكەندەي وزگەرىسسىز قالادى، بىراق شەتەلدەن كەلەتىن تاسىمالداۋشىلار ءۇشىن بەنزين قىمباتتايدى. ديزەل كەرىسىنشە ارزاندايدى: 450 تەڭگەدەن 315 تەڭگەگە.
ايتا كەتەيىك، بۇعان دەيىن رەسەيدىڭ كەيبىر مۇناي وڭدەۋ زاۋىتتارىنا دروندار شابۋىل جاساپ، رەسەيدە بەنزين مەن ديزەل تاپشى بولۋ قاۋپى تونگەن سوڭ، قازاقستاننان 100 مىڭ توننا بەنزين سۇراعانى جايلى مالىمەت تاراعانىن حابارلاعان ەدىك.
رەسەي ادەتتە جانارمايدىڭ نەتتو – ەكسپورتەرى (ياعني، ەكسپورت كولەمى يمپورتىنان ارتىق) جانە حالىقارالىق نارىقتارعا جەتكىزۋشى بولىپ تابىلادى. بىراق مۇناي وڭدەۋ زاۋىتارىنىڭ دروندار شابۋىلىنا ۇشىراۋى رەسەي مۇناي كومپانيالارىن يمپورت جاساۋعا ءماجبۇر ەتكەن سياقتى.
دەرەككوزدىڭ ايتۋىنشا، ماسكەۋ قازاقستاننان رەسەيگە جەتكىزۋگە ءازىر تۇراتىن 100 مىڭ توننا بەنزيننىڭ توتەنشە رەزەرۆىن قۇرۋدى سۇراعان.
سونداي-اق، ماسكەۋ 1 ناۋرىزدان باستاپ جانارماي تاپشىلىعىنىڭ الدىن الۋ ءۇشىن التى ايعا بەنزين ەكسپورتىنا تىيىم سالعان. دەگەنمەن بۇل ماسكەۋ باسقاراتىن ەۋرازيالىق ەكونوميكالىق وداققا، ونىڭ ىشىندە قازاقستانعا، سونداي-اق موڭعوليا سياقتى كەيبىر ەلدەرگە قاتىسى جوق.
ال ترەيدەرلەر رەسەيدەگى جاعداي ۋشىعىپ كەتسە، تىيىمدى كەڭەيتۋ مۇمكىن ەكەنىن ايتادى
