«تازا قازاقستان» رەسپۋبليكالىق ەكولوگيالىق اكتسياسىنىڭ «كيەلى مەكەن» اپتالىعى اياسىندا ۇلىتاۋ وبلىسىندا تاريحي ورىندار مەن مادەني ەسكەرتكىشتەر اۋماعى تازارتىلدى. بۇل تۋرالى وبلىس اكىمدىگىنىڭ قوعامدىق دامۋ باسقارماسى حابارلادى.
رەسپۋبليكالىق ەكولوگيالىق اكتسيا اياسىندا وبلىستاعى «جوشى حان» تاريحي-مادەني كەشەنى، «تەرەكتى اۋليە» كەشەنى، الاشا حان، دومباۋىل كەسەنەلەرى، جەزقازعان، ساتباەۆ، قاراجال قالالارى مەن جاڭاارقا، ۇلىتاۋ اۋداندارىنداعى ەسكەرتكىشتەر، اللەيالار مەن مەموريالدىق الاڭداردا سەنبىلىك ءوتتى.
وعان بارلىعى 300-گە جۋىق ەڭبەك ۇجىمدارىنان 4 مىڭنان استام ادام قاتىستى. سەنبىلىككە 122 ارنايى تەحنيكا جۇمىلدىرىلىپ، 448 گەكتار اۋماق قوقىستان تازارتىلدى. بارلىعى 65 رۇقسات ەتىلمەگەن قوقىس ورنى جويىلىپ، 10 اۋلاعا جاڭا قوقىس كونتەينەرلەرى ورناتىلدى. سەنبىلىك بارىسىندا سونىمەن قاتار، 632 اعاشتىڭ قۋراعان بۇتاقتارى كەسىلىپ، 405 ءتۇپ تال وتىرعىزىلدى.
ەستەرىڭىزگە سالساق، «تازا قازاقستان» ەكولوگيالىق اكتسياسى 6 ساۋىردە باستالىپ، 11 مامىرعا دەيىن جالعاسادى. اكتسيا اياسىندا تاريحي-مادەني ەسكەرتكىشتەر ماڭىندا، ارداگەرلەردىڭ ۇيلەرىندە سەنبىلىكتەر وتكىزىپ، جاپپاي اعاش وتىرعىزۋ جوسپارلانعان.
