قىرعىزستاندا ۇكىمەت مۇشەلەرىنە تويعا بارۋعا تىيىم سالىندى. بۇل تۋرالى ەلدىڭ پرەمەر-ءمينيسترى اقىلبەك جاپاروۆ پرەزيدەنت اكىمشىلىگى القاسىنىڭ وتىرىسىندا ايتتى، دەپ حابارلايدى «ادىرنا» ءتىلشىسى 24.kg-گە سىلتەمە جاساپ.
ول پرەزيدەنتتىڭ بارلىق جارلىعى مەن تاپسىرماسى ساپالى ءارى ۋاقىتىلى ورىندالۋعا ءتيىس ەكەنىن مالىمدەدى.
«ەگەر ءسىز ءبىر جەردە ىسىراپشىلدىق كورسەڭىز، ول جەرگە بارماڭىز. تويدا جۇرمەڭدەر»،— دەدى ۇكىمەت باسشىسى.
ەسكە سالايىق، 2022 جىلدىڭ اقپانىندا قىرعىزستان پرەزيدەنتى سادىر جاپاروۆ ءداستۇرلى مەرەكەلەردى وتكىزۋ كەزىندە شەكتەۋلەر ەنگىزۋ تۋرالى جارلىققا قول قويعان ەدى. زاڭنىڭ ماقساتى – ازاماتتاردىڭ الەۋمەتتىك-ەكونوميكالىق ءومىر ءسۇرۋ دەڭگەيىن كوتەرۋ، سونداي-اق قوعامنىڭ رۋحاني اتموسفەراسىنا تەرىس اسەر ەتەتىن ءدىني راسىمدەردى جانە وزگە دە ءىس-شارالاردى وتكىزۋ كەزىندە ىسىراپشىلدىققا جول بەرمەۋ.
