بيىل قازاقستان مەكتەپتەرىندە سوڭعى قوڭىراۋ سالتاناتى بولمايدى. ونىڭ ورنىنا بارلىق مەكتەپتە وقۋ جىلىنىڭ اياقتالۋىنا ارنالعان بىرىڭعاي سىنىپ ساعاتى وتەدى، دەپ حابارلايدى “ادىرنا” ۇلتتىق پورتالى وقۋ-اعارتۋ مينيسترلىگىنىڭ مالىمدەمەسىنە سىلتەپ.
ۆەدومستۆو جاريالاعان مالىمەتكە سۇيەنسەك، 2023-2024 وقۋ جىلىن 3,8 ملن-نان استام قازاقستاندىق وقۋشى اياقتايدى، ونىڭ 186 مىڭى – مەكتەپ تۇلەكتەرى. بيىلعى وقۋ جىلىنىڭ ۇزاقتىعى 34 اپتانى قۇرايدى، وقۋ 25 مامىردا اياقتالادى.
«سۋ تاسقىنىنان ورىن العان جاعدايعا جانە 25 مامىردىڭ دەمالىس كۇنىنە سايكەس كەلۋىنە بايلانىستى 24 مامىر كۇنى بارلىق مەكتەپتەردە ساباقتا 2023-2024 وقۋ جىلىنىڭ اياقتالۋىنا ارنالعان سىنىپ ساعاتى ۇيىمداستىرىلادى. وندا سىنىپ جەتەكشىلەرى وقۋشىلارمەن بىرگە وتكەن وقۋ جىلىن قورىتىندىلايدى. سۋ تاسقىنى بولعان وڭىرلەردەگى ساباق قاشىقتىقتان ۇيىمداستىرىلعان بالالار ءۇشىن سىنىپ ساعاتتارى ونلاين فورماتتا بولادى» – دەپ اتاپ ءوتتى تاربيە جۇمىسى جانە قوسىمشا ءبىلىم بەرۋ دەپارتامەنتى ديرەكتورىنىڭ ورىنباسارى قارلىعاش قۇرمانبەكوۆا.
11 (12) سىنىپ تۇلەكتەرىنە اتتەستات تاپسىرۋ جانە ەرەكشە ۇلگىدەگى «التىن بەلگىمەن» ماراپاتتاۋ 19-22 ماۋسىم ارالىعىندا مەكتەپتەردەگى بارلىق ەمتيحاندار اياقتالعاننان كەيىن وتەدى. بۇدان بولەك مينيسترلىك وكىلدەرى 9-11-سىنىپ تۇلەكتەرىنىڭ قاۋىپسىزدىگىن جانە ەمتيحاندارعا ساپالى دايىندىعىن قامتاماسىز ەتۋ ماقساتىندا اقشا جيناۋعا، سالتاناتتى ءىس-شارالار، بانكەتتەر ۇيىمداستىرۋعا جانە اۆتوموبيلدەرمەن شىعۋعا تىيىم سالىناتانىن ەسكەرتتى.
