الەمگە ايگىلى Netflix ستريمينگتىك پلاتفورماسى قىرعىزستان مەن قازاقستاندا تۋريستىك رەاليتي-شوۋ تۇسىرىلەتىنىن حابارلادى. الماتىدا جوبانىڭ ءتۇسىرىلىمى 20-30 مامىر ارالىعىندا وتەدى، دەپ حابارلايدى “ادىرنا” ۇلتتىق پورتالى.
Almaty Tourism Bureau ءباسپاسوز قىزمەتىنىڭ مالىمەتىنشە، جاھاندىق ويىن-ساۋىق يندۋسترياسىنداعى ەڭ ىقپالدى Netflix كومپانياسى رەاليتي-تۋر شوۋ ءتۇسىرۋ ورنى رەتىندە الماتىنىڭ اسەم تاۋلارى مەن قىرعىز تابيعاتىن تاڭداعان.
ايتا كەتەيىك، Netflix - كەڭ اۋديتورياعا فيلمدەر مەن تەلەحيكايالاردىڭ ۇلكەن تاڭداۋىن ۇسىناتىن جانە وتە تانىمال جەتەكشى اعىندى پلاتفورما.
اۋديتورياسى الەم بويىنشا جارتى ميللياردتان استام ادامدى قۇرايدى. Netflix-ءتىڭ 270 ميلليونعا جۋىق اقىلى جازىلۋشىسى بار.
سوندىقتان الماتىدا تۋريستىك رەاليتي-شوۋدى ءتۇسىرۋ – ەلدى تانۋعا جانە تۋريستىك الەۋەتتى ارتتىرۋعا ىقپال ەتەتىن ماڭىزدى «كاپيتال» بولماق. جوبانىڭ جۇزەگە اسۋى الماتى تۋريستىك بيۋروسىنىڭ كومانداسى مەن قىرعىزستاننىڭ پروديۋسەرلىك كومپانياسىنىڭ ىنتىماقتاستىعىنىڭ ناتيجەسىندە بولادى.