بۇگىن، 10 مامىردا الماتى وبلىسى ۇيعىر اۋدانى شونجى ەلدى مەكەنىندە اتى اڭىزعا اينالعان باتىر، قولباسى، اۋليە-ابىز بابا المەرەك جانشىقۇلىنىڭ ەسكەرتكىشى بوي كوتەردى، دەپ حابارلايدى «ادىرنا» ءتىلشىسى.
«اۋدانىمىزدىڭ ورتالىعىندا بارلىق تۇرعىن ءۇشىن بىرەگەي ساياباق اشىلدى. جاڭا ساياباقتىڭ ورتالىعىندا ماڭگىلىك قۇندىلىقتار دا ءوز ورنىن تاپتى. ەرەكشە وقيعا كۇنى اشىلعان المەرەك باتىردىڭ ءزاۋلىم ەسكەرتكىشى دە قوعامىمىزدى تاريحي مۇرالارعا دەگەن قۇرمەت پەن سۇيىسپەنشىلىگىن ارتتىرا ءتۇستى»،—دەپ جازدى ۇيعىر اۋدانىنىڭ اكىمدىگى.
ايتا كەتەيىك، المەرەك ابىزدىڭ ەسكەرتكىشىن ورناتۋ ماسەلەسى 2020 جىلى كوتەرىلگەن ەدى. 2021 جىلى قاريالار مەن القا مۇشەلەرى جارىسقا قاتىسۋشىلاردىڭ جۇمىستارىن تالقىعا سالىپ، 8 ءمۇسىنشىنىڭ 15 جۇمىسى ادىلقازى القاسىنا تانىستىرىلدى. باستامانى جۇزەگە اسىرۋ ماقساتىندا اۋىلعا كىرەبەرىس جەردەن كەشەننىڭ قۇرىلىسىنا 3 گەكتار جەر تەلىمى بولىنگەن بولاتىن.
المەرەك ابىز — قازاقتىڭ ۇلى ءجۇز ءۇيسىن تارماعىنداعى البان تايپاسىنان شىققان باتىر. قازاق-جوڭعار سوعىسىنا باسىنان اياعىنا دەيىن قاتىسقان باتىر. سوعىس اقىرىنا قاراي قارتايا باستاعاندا اسكەرگە سارباز جاتتىقتىرۋمەن اينالىسقان. شاكىرتتەرىنەن اتاقتى رايىمبەك باتىر، ءوز نەمەرەسى ساۋرىق باتىر شىققان.
<
