Búgin, 10 mamyrda Almaty oblysy Uıǵyr aýdany Shonjy eldi mekeninde aty ańyzǵa aınalǵan batyr, qolbasy, áýlıe-abyz baba Álmerek Janshyqulynyń eskertkishi boı kóterdi, dep habarlaıdy «Adyrna» tilshisi.
«Aýdanymyzdyń ortalyǵynda barlyq turǵyn úshin biregeı saıabaq ashyldy. Jańa saıabaqtyń ortalyǵynda máńgilik qundylyqtar da óz ornyn tapty. Erekshe oqıǵa kúni ashylǵan Álmerek batyrdyń záýlim eskertkishi de qoǵamymyzdy tarıhı muralarǵa degen qurmet pen súıispenshiligin arttyra tústi»,—dep jazdy Uıǵyr aýdanynyń ákimdigi.
Aıta keteıik, Álmerek abyzdyń eskertkishin ornatý máselesi 2020 jyly kóterilgen edi. 2021 jyly qarııalar men alqa músheleri jarysqa qatysýshylardyń jumystaryn talqyǵa salyp, 8 músinshiniń 15 jumysy ádilqazy alqasyna tanystyryldy. Bastamany júzege asyrý maqsatynda aýylǵa kireberis jerden keshenniń qurylysyna 3 gektar jer telimi bólingen bolatyn.
Álmerek abyz — qazaqtyń Uly júz Úısin tarmaǵyndaǵy Alban taıpasynan shyqqan batyr. Qazaq-jońǵar soǵysyna basynan aıaǵyna deıin qatysqan batyr. Soǵys aqyryna qaraı qartaıa bastaǵanda áskerge sarbaz jattyqtyrýmen aınalysqan. Shákirtterinen ataqty Raıymbek batyr, óz nemeresi Saýryq batyr shyqqan.
<
