ۇلان اۋدانى تۇرعىندارىنىڭ سىرتىنان الدەكىمدەر نەسيەلەر راسىمدەگەن. ءتۇرلى مەكەمەلەردىڭ تابالدىرىعىن توزدىرعان تارعىن ەلدى مەكەنىنىڭ 12 تۇرعىنى ەش جەردەن جاردەم بولماعان سوڭ «AMANAT» پارتياسىنىڭ ۇلان اۋداندىق فيليالىنان كومەك سۇراعان.
2016 جىلى الاياقتار اۋىلدىقتاردىڭ «جەكە دەرەكتەرىن تسيفرلىق بازاعا ەنگىزەمىز» دەگەن سىلتاۋمەن قۇجاتتارىن العان. الايدا كۇدىكتىلەردىڭ كوزدەگەنى باسقا ەدى. زارداپ شەككەندەردىڭ ايتۋىنشا، ولار ەشبىر قۇجاتقا قول قويماعان جانە ەشقانداي اقشا الماعان.
«الاياقتار ءار قايسىمىزدىڭ اتىمىزعا 3 ميلليوننان استام تەڭگەگە قارجىلاي نەسيە راسىمدەگەن. ءبىز بۇل تۋرالى 2018 جىلدارى ەسەپ شوتتارىمىز بۇعاتتالعان كەزدە بىلدىك. بىردەن قۇزىرلى مەكەمەگە جۇگىندىك، بىراق ەشبىرى كومەكتەسپەدى. بارار جەر، باسار تاۋىمىز قالماعاندىقتان «AMANAT» پارتياسىنىڭ ۇلان اۋداندىق فيليالىنان كومەك سۇرادىق. ارادا كوپ وتپەي ماسەلەمىزدى تولىقتاي شەشىپ بەردى»،- دەيدى اۋىل تۇرعىنى تابىس ابدۋلحاقوۆ.
12 ازاماتتىڭ اتىنا جالپى جيىنى 36 ميلليون تەڭگە سوماسىنداعى نەسيە راسىمدەلگەن. سالدارىنان زارداپ شەگۋشىلەردىڭ شوتتارى بۇعاتتالىپ، ءتىپتى بانك كارتالارىنان ەڭبەكاقىلارىن دا الا الماعان. پارتيالىقتار بۇل ءىستى مۇقيات زەرتتەپ، اۋىلدىقتاردى تاقىرعا وتىرعىزعان الاياقتار توبىمەن بايلانىسقا شىقتى.
«ءبىز ولارعا قاراپايىم ادامداردى الداۋ ارقىلى بايىپ، تابىس تاپپايتىندارىن تۇسىندىردىك. ولاردان وسى قارىزداردىڭ بارلىعىن جابۋدى سۇرادىق. قيىن جاعدايعا تاپ بولعان 12 تۇرعىننىڭ بارلىق مۇلكىنەن بۇگىندە بۇعات الىنىپ تاستالدى. «AMANAT» پارتياسىنىڭ «قارىزسىز قوعام» جوباسى بار. سونىڭ اياسىندا تۇرعىنداردىڭ قارجىلىق ساۋاتىن ارتتىرۋدامىز. ولار ارنايى كۋرستاردان وتەدى»، - دەدى «AMANAT» پارتياسىنىڭ ۇلان اۋداندىق فيليالىنىڭ توراعاسى مارعۇلان امەنوۆ.
