Ūlan audany tūrǧyndarynyŋ syrtynan äldekımder nesieler räsımdegen. Türlı mekemelerdıŋ tabaldyryǧyn tozdyrǧan Tarǧyn eldı mekenınıŋ 12 tūrǧyny eş jerden järdem bolmaǧan soŋ «AMANAT» partiiasynyŋ Ūlan audandyq filialynan kömek sūraǧan.
2016 jyly alaiaqtar auyldyqtardyŋ «jeke derekterın sifrlyq bazaǧa engızemız» degen syltaumen qūjattaryn alǧan. Alaida küdıktılerdıŋ közdegenı basqa edı. Zardap şekkenderdıŋ aituynşa, olar eşbır qūjatqa qol qoimaǧan jäne eşqandai aqşa almaǧan.
«Alaiaqtar är qaisymyzdyŋ atymyzǧa 3 millionnan astam teŋgege qarjylai nesie räsımdegen. Bız būl turaly 2018 jyldary esep şottarymyz būǧattalǧan kezde bıldık. Bırden qūzyrly mekemege jügındık, bıraq eşbırı kömektespedı. Barar jer, basar tauymyz qalmaǧandyqtan «AMANAT» partiiasynyŋ Ūlan audandyq filialynan kömek sūradyq. Arada köp ötpei mäselemızdı tolyqtai şeşıp berdı»,- deidı auyl tūrǧyny Tabys Abdulhaqov.
12 azamattyŋ atyna jalpy jiyny 36 million teŋge somasyndaǧy nesie räsımdelgen. Saldarynan zardap şeguşılerdıŋ şottary būǧattalyp, tıptı bank kartalarynan eŋbekaqylaryn da ala almaǧan. Partiialyqtar būl ıstı mūqiiat zerttep, auyldyqtardy taqyrǧa otyrǧyzǧan alaiaqtar tobymen bailanysqa şyqty.
«Bız olarǧa qarapaiym adamdardy aldau arqyly baiyp, tabys tappaityndaryn tüsındırdık. Olardan osy qaryzdardyŋ barlyǧyn jabudy sūradyq. Qiyn jaǧdaiǧa tap bolǧan 12 tūrǧynnyŋ barlyq mülkınen bügınde būǧat alynyp tastaldy. «AMANAT» partiiasynyŋ «Qaryzsyz qoǧam» jobasy bar. Sonyŋ aiasynda tūrǧyndardyŋ qarjylyq sauatyn arttyrudamyz. Olar arnaiy kurstardan ötedı», - dedı «AMANAT» partiiasynyŋ Ūlan audandyq filialynyŋ töraǧasy Marǧūlan Ämenov.
