قوستانايدا كوكتەمگى سۋ تاسقىنى كەزىندە باسپاناسىنان ايىرىلعان حالىق ءۇشىن جەكە تۇرعىن ۇيلەردىڭ قۇرىلىسى باستالدى. 21 مامىردان باستاپ «قوناي» شاعىن اۋدانىندا قۇرىلىس قارقىندى ءجۇرىپ جاتىر. قالا اكىمى مارات جۇندىباەۆ بۇگىن جۇمىس بارىسىمەن تانىستى. اكىمنىڭ ايتۋىنشا، جالپى وبلىس ورتالىعىندا تاسقىننان زارداپ شەككەن 96 ءۇي قايتا قالپىنا كەلتىرىلمەيدى دەپ تانىلعان.
- ازىرگە تەك 9 ادام جەكە تۇرعىن ءۇيدىڭ قۇرىلىسىنا كەلىسىمىن بەردى. وزدەرىڭىز كورىپ وتىرعانداي، مەردىگەر جۇمىسقا كىرىسىپ كەتتى. 8 زارداپ شەگۋشى ءالى ناقتى شەشىم قابىلداعان جوق. قالعاندارى پاتەرگە كوشۋگە بەل بۋىپ وتىر. قازىرگى كۇنى 20-دان ارتىق پاتەرگە قاتىستى جالپى قۇنى جارتى ملرد تەڭگەگە كەلىسىمشارت جاسالدى، - دەپ حابارلادى قوستاناي قالاسىنىڭ اكىمى مارات جۇندىباەۆ.
بۇل جەردە تاسقىننان زارداپ شەككەندەرگە ارنالىپ جالپى كولەمى 80 شارشى مەترلىك 9 جەكە تۇرعىن ءۇي بوي كوتەرمەك. ولاردىڭ بارلىعىنا سۋ، جىلۋ، جارىق، گاز تارتىلىپ، اۋماعى اباتاندىرىلاتىن بولادى. قۇرىلىس جۇمىستارىن قىسقا مەرزىمدە اياقتاۋ جوسپارلانۋدا.
قۇرىلىس بارىسىمەن تانىسقان قالا باسشىسى تابيعي اپاتتىڭ زاردابىن جويۋعا باعىتتالعان جۇمىستاردى ساپالى ءارى جەدەل جۇرگىزۋگە بارلىق مۇمكىندىكتەر قاراستىرىلاتىنىن اتاپ ءوتتى.
