Qostanaıda kóktemgi sý tasqyny kezinde baspanasynan aıyrylǵan halyq úshin jeke turǵyn úılerdiń qurylysy bastaldy. 21 mamyrdan bastap «Qonaı» shaǵyn aýdanynda qurylys qarqyndy júrip jatyr. Qala ákimi Marat Júndibaev búgin jumys barysymen tanysty. Ákimniń aıtýynsha, jalpy oblys ortalyǵynda tasqynnan zardap shekken 96 úı qaıta qalpyna keltirilmeıdi dep tanylǵan.
- Ázirge tek 9 adam jeke turǵyn úıdiń qurylysyna kelisimin berdi. Ózderińiz kórip otyrǵandaı, merdiger jumysqa kirisip ketti. 8 zardap shegýshi áli naqty sheshim qabyldaǵan joq. Qalǵandary páterge kóshýge bel býyp otyr. Qazirgi kúni 20-dan artyq páterge qatysty jalpy quny jarty mlrd teńgege kelisimshart jasaldy, - dep habarlady Qostanaı qalasynyń ákimi Marat Júndibaev.
Bul jerde tasqynnan zardap shekkenderge arnalyp jalpy kólemi 80 sharshy metrlik 9 jeke turǵyn úı boı kótermek. Olardyń barlyǵyna sý, jylý, jaryq, gaz tartylyp, aýmaǵy abatandyrylatyn bolady. Qurylys jumystaryn qysqa merzimde aıaqtaý josparlanýda.
Qurylys barysymen tanysqan qala basshysy tabıǵı apattyń zardabyn joıýǵa baǵyttalǵan jumystardy sapaly ári jedel júrgizýge barlyq múmkindikter qarastyrylatynyn atap ótti.
