ارمەنيانىڭ سولتۇستىگىندەگى دەبەد وزەنىنىڭ ارناسىنان اسىپ كەتۋى سالدارىنان سۋ تاسقىنى بولدى، - دەپ حابارلايدى “ادىرنا” ۇلتتىق پورتالى news.am سايتىنا سىلتەمە جاساپ.
توتەنشە جاعدايعا بايلانىستى ارمەنيانىڭ ىشكى ىستەر مينيسترلىگى مالىمدەمە جاسادى.
ۇلتتىق داعدارىستى باسقارۋ ورتالىعى مەن لوري ايماقتىق داعدارىستى باسقارۋ ورتالىعىنا دەبەد وزەنىندەگى سۋ تاسقىنىنا بايلانىستى ساعات 00:40-تان باستاپ كوپتەگەن دابىلدار تۇسە باستاعانى اتاپ ءوتىلدى.
ارمەنيانىڭ سولتۇستىگىندەگى سۋ تاسقىنىنان ءبىر ادام قازا تاۋىپ، تاعى ءبىر ادام ءىز-ءتۇزسىز جوعالعانى اتالدى. بىرقاتار عيماراتتار مەن كوپىرلەر قيراپ، جول جابىندارى مەن باسقا دا ينفراقۇرىلىمدار بۇلىنگەن. ۆانادزور-الاۆەردي تاس جولىنىڭ ءبىر بولىگىن سۋ باسقان: ۇزىندىعى شامامەن 50 مەتر بولاتىن ۋچاسكە وپىرىلعان.
دزوراگەت اۋىلىنىڭ 70 تۇرعىنى قاۋىپسىز ايماققا كوشىرىلدى. تاسقىن سالدارىن جويۋعا لوري اۋداندىق اۆاريالىق-قۇتقارۋ جۇمىستارى باسقارماسىنىڭ 7 جاۋىنگەرلىك بريگاداسى، ءورت ءسوندىرۋ جانە اۆاريالىق-قۇتقارۋ جۇمىستارى جاساعىنىڭ 2 جەدەل توبى، تاۆۋش وبلىستىق اۆاريالىق-قۇتقارۋ جۇمىستارى باسقارماسىنىڭ 2 جاۋىنگەرلىك بريگاداسى جانە 1 جەدەل-قۇتقارۋ جاساعى جۇمىلدىرىلدى.
دەبەد وزەنىنىڭ ارناسىنان اسىپ كەتۋىنە بايلانىستى م-6 ارمەنيا-گرۋزيا تاس جولى ەكى باعىتتا دا جابىلدى. سونىمەن قاتار، كوشكىن سالدارىنان ەرەۆاننان تبيليسيگە جانە كەرى باعىتتا پويىزدار قوزعالىسى توقتاتىلدى.
