Armenııanyń soltústigindegi Debed ózeniniń arnasynan asyp ketýi saldarynan sý tasqyny boldy, - dep habarlaıdy “Adyrna” ulttyq portaly news.am saıtyna silteme jasap.
Tótenshe jaǵdaıǵa baılanysty Armenııanyń Ishki ister mınıstrligi málimdeme jasady.
Ulttyq daǵdarysty basqarý ortalyǵy men Lorı aımaqtyq daǵdarysty basqarý ortalyǵyna Debed ózenindegi sý tasqynyna baılanysty saǵat 00:40-tan bastap kóptegen dabyldar túse bastaǵany atap ótildi.
Armenııanyń soltústigindegi sý tasqynynan bir adam qaza taýyp, taǵy bir adam iz-túzsiz joǵalǵany ataldy. Birqatar ǵımarattar men kópirler qırap, jol jabyndary men basqa da ınfraqurylymdar búlingen. Vanadzor-Alaverdı tas jolynyń bir bóligin sý basqan: uzyndyǵy shamamen 50 metr bolatyn ýchaske opyrylǵan.
Dzoraget aýylynyń 70 turǵyny qaýipsiz aımaqqa kóshirildi. Tasqyn saldaryn joıýǵa Lorı aýdandyq avarııalyq-qutqarý jumystary basqarmasynyń 7 jaýyngerlik brıgadasy, órt sóndirý jáne avarııalyq-qutqarý jumystary jasaǵynyń 2 jedel toby, Tavýsh oblystyq avarııalyq-qutqarý jumystary basqarmasynyń 2 jaýyngerlik brıgadasy jáne 1 jedel-qutqarý jasaǵy jumyldyryldy.
Debed ózeniniń arnasynan asyp ketýine baılanysty M-6 Armenııa-Grýzııa tas joly eki baǵytta da jabyldy. Sonymen qatar, kóshkin saldarynan Erevannan Tbılısıge jáne keri baǵytta poıyzdar qozǵalysy toqtatyldy.
