اقىن ءجۇرسىن ەرمان ۇزاق ۋاقىتتان كەيىن كوپشىلىك الدىنا ءوز اياعىمەن ءجۇرىپ شىقتى. ول كەشە، 9 مامىردا قوستاناي وبلىسىندا وتكەن رەسپۋبليكالىق اقىندار ايتىسىنا بارعان. اقىننىڭ فوتوسىن ءماجىلىس دەپۋتاتى امانجول ءالتاي جەلىگە جۇكتەدى، دەپ حابارلايدى “ادىرنا” ۇلتتىق پورتالى.
ۇزاق جىلدار بويى ايتىستىڭ باسى-قاسىندا جۇرگەن ءجۇرسىن ەرمان قازاقتىڭ حالىق اقىنى قونىسباي ابىلگە ارنالعان رەسپۋبليكالىق اقىندار ايتىسىندا قازىلار القاسىندا تورەلىك ەتتى.
«ءجۇرسىن ەرمان ۇستازىمىز باستاعان قازىلار القاسىنا، ايتىس اقىندارىنا، ۇيىمداستىرۋعا اتسالىسقان ازاماتتارعا العىس بىلدىرەمىن»، - دەپ جازدى ول.
ەسكە سالايىق، ءجۇرسىن ەرمان بىلتىر اۋىرىپ، جانساقتاۋ بولىمىنە تۇسكەن. كەيىن ەۋروپاعا ەمدەلۋگە كەتكەن. 2024 جىلى اقىننىڭ دەنساۋلىعى جاقسارىپ، اياققا تۇرعانى حابارلانعان ەدى.
